قازاقستاندا تەگىن مەديسينالىق كومەكتىڭ كەپىلدىك بەرىلگەن كولەمى (تمككك) جانە ءمامس شەڭبەرىندە ەم الاتىنداردى قامتاماسىز ەتۋ ءۇشىن جانە ءدارىحانالاردىڭ بولشەك ساۋدا جەلىسىندە ساتىلاتىن پرەپاراتتاردىڭ شەكتى قۇنىن تومەندەتۋدى كوزدەيتىن دارىلىك زاتتاردىڭ باعاسىن رەتتەۋدىڭ جاڭا تەتىگى جۇمىس ىستەمەك.
بۇل تۋرالى دەنساۋلىق ساقتاۋ ۆيسە-مينيسترى ەرجان نۇرلىبايەۆ وكق-دا وتكەن باسپا ءسوز بريفينگىندە ايتتى، دەپ حابارلايدى aqshamnews.kz
ۆيسە-منيستردىڭ سوزىنشە، دارى-دارمەكتىڭ شەكتى قۇنىن تومەندەتۋ قۇرالدارىنىڭ ءبىرى بۇرىن دارى-دارمەكتىڭ قۇنىنا ەنگىزىلگەن قوسىمشا شىعىستاردى الىپ تاستاۋ بولادى: ماركەتينگ (30%-عا دەيىن)، كولىك (15%-عا دەيىن) جانە ساپانى باعالاۋ شىعىندارى.
ۇستەمە باعالاردىڭ رەگرەسسيۆتى شكالاسىن قايتا قاراۋ ناتيجەسىندە ولاردى قولدانۋ شەگى ايتارلىقتاي تومەندەدى. تەگىن مەديسينالىق كومەكتىڭ كەپىلدىك بەرىلگەن كولەمى (تمككك) جانە مىندەتتى الەۋمەتتىك مەديسينالىق ساقتاندىرۋ (ءمامس) شەڭبەرىندە ولار 20%-عا دەيىن، كوتەرمە ساتۋ ءۇشىن 25%-عا، ال بولشەك ساۋدا ءۇشىن 30%-عا دەيىن (بۇرىن 55%-بەن سالىستىرعاندا)، – دەيدى.
ەگەر باستاپقى پرەپارات نارىقتا بولماعان جاعدايدا، وتاندىق انالوگتىڭ شەكتى قۇنى يمپورتتالاتىن دارىلەردىڭ ورتاشا باعاسىنان اسپاۋعا ءتيىس. مۇنداي ساياسات باسەكەلەستىكتى ىنتالاندىرۋعا جانە بارلىق تاراپتار مۇددەلەرىنىڭ تەڭگەرىمىن قامتاماسىز ەتە وتىرىپ، وتاندىق وندىرۋشىلەر ءۇشىن جاعدايلاردى جاقسارتۋعا مۇمكىندىك بەرەتىنىن اتاپ ءوتتى.
ۆيسە-مينيستر سونداي-اق فارماسيەۆتيكالىق نارىقتا دارىلىك زاتتاردىڭ قولجەتىمدىلىگىن ارتتىرۋ ماقساتىندا دەنساۋلىق ساقتاۋ مينيسترلىگى مونوپولياعا قارسى ورگانمەن بىرلەسىپ، جول كارتاسى شەڭبەرىندە كوتەرمە جانە بولشەك ساۋدادا وتكىزۋ ءۇشىن دارىلىك زاتتاردىڭ باعاسىن كەزەڭ-كەزەڭىمەن رەتتەۋ جونىندەگى ءىس-شارالار جۇرگىزىلىپ جاتقانىن ەسكە سالدى. وسىلايشا، 2023 جىلى باسەكەلەستىك ورتاعا رەسەپتسىز ساتىلاتىن دارىلىك زاتتاردىڭ 302 اتاۋى، ال 2024 جىلى – رەسەپتسىز ساتىلاتىن دارىلىك زاتتاردىڭ 952 اتاۋى شىعارىلدى.