وتكەن جىلعا قاراعاندا ءولىم-جىتىم 5 پايىزعا تومەندەگەن.
2022 جىلدىڭ 4 ايىنىڭ قورىتىندىسى بويىنشا ەلىمىزدە ءولىم-جىتىم دەڭگەيى تومەندەگەن. بۇل تۋرالى ق ر دەنساۋلىق ساقتاۋ ءمينيسترى اجار عينيات ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مىندەتتى الەۋمەتتىك مەديسينالىق ساقتاندىرۋ قورىنىڭ جۇمىسى حالىقتىڭ جالپى دەنساۋلىق جاعدايىمەن تىكەلەي بايلانىستى. سوندىقتان دا بۇگىنگى جيىندا ايتىلاتىن ۇسىنىس، پىكىر، يدەيا مەن وتىنىشتەر اتالعان سالانى جەتىلدىرە تۇسۋگە سەپتىگىن تيگىزەدى. پاندەمياعا بايلانىستى حالىق دەنساۋلىعىنىڭ ناشارلاعانىن بىلەسىزدەر. كوروناۆيرۋستىڭ سالدارىنان ەلىمىزدە ءولىم-جىتىمنىڭ كوبەيگەنىن دە حاباردارسىزدار»، - دەدى اجار عينيات ەلوردادا وتكەن مىندەتتى الەۋمەتتىك مەديسينالىق ساقتاندىرۋ ماسەلەلەرىنە ارنالعان دوڭگەلەك ۇستەل بارىسىندا.
ءمينيستردىڭ ايتۋىنشا، حالىقتىڭ دەنساۋلىق جاعدايىنا اي سايىن ساراپتاما جاسالادى.
«بيىلعى جىلدىڭ 4 ايىنىڭ قورىتىندىسى بويىنشا ادام ءولىمى ازايدى. وتكەن جىلعا قاراعاندا ءولىم-جىتىم 5 پايىزعا تومەندەگەن. بۇگىندە ەپيدەميولوگيالىق جاعداي جاقساردى. ەلىمىز پاندەميادان كەيىن اياقتان قايتا تۇرىپ كەلەدى. وسى ورايدا حالىق دەنساۋلىعى كورسەتكىشى دە جاقسارىپ كەلەدى»، - دەيدى ول.
ايتا كەتسەك، نۇر-سۇلتان قالاسىندا ەلىمىزدە ەنگىزىلگەن مىندەتتى الەۋمەتتىك مەديسينالىق ساقتاندىرۋ جۇيەسى قىزمەتىنە ارنالعان دوڭگەلەك ۇستەل ءوتىپ جاتىر.
اتالعان شاراعا سالا ماماندارى مەن جاۋاپتى تۇلعالار قاتىسىپ، مامس-كە قاتىستى تۇيتكىلدى ماسەلەلەردى ورتاعا سالۋدا.