№7 قالالىق كلينيكالىق اۋرۋحانا دارىگەرلەرى جول اپاتىنا ۇشىراعان 40 جاستاعى ەر ادامدى ولىمنەن اراشالاپ قالدى. جاراقات دەڭگەيىنىڭ اۋىرلىعى سونشالىق، ونىڭ وڭ اياعىن كەسىپ تاستاۋ ءقاۋپى تۋىنداعان بولاتىن، دەپ حابارلايدى اۋرۋحانانىڭ باسپا ءسوز قىزمەتى.
اۋرۋحانانىڭ پوليجاراقات بولىمشەسى مەڭگەرۋشىسى رامازان اسكەروۆتىڭ ايتۋىنشا، پاسيەنت مۇندا جەدەل جاردەممەن جەتكىزىلگەن. موپەد جۇرگىزۋشىسى جولدا اپاتقا ۇشىراپ، كوپتەگەن جاراقات العان. كەلگەن كەزدە ول اسا اۋىر حالدە بولعاندىقتان سىنىقتىڭ اۋقىمىن تولىق باعالاۋ مۇمكىن بولمادى.
«مەن مۇنى ەرەكشە كلينيكالىق جاعداي دەر ەدىم. اپات كەزىندە ناۋقاس كوپتەگەن جاراقاتتار العان، دەنەسىنىڭ مساۋ جەرى جوق. وڭ اياعىنىڭ ءپىشىنى تولىقتاي بۇزىلعان، جىلىنشىك اۋماعىنىڭ تەرىسى سىدىرىلىپ، ەزىلىپ قالعان، ۇلكەن جارىق جارا پايدا بولىپتى. سۇيەكتەرى دە سىنعان، سول سەبەپتى اياعىنىڭ باسى قوزعالماي قالعان. ادەتتە مۇنداي جاعدايدا اياقتى كەسىپ تاستايمىز»، – دەيدى رامازان اسكەروۆ.
پاسيەنتتى تولىق تەكسەرىپ شىققاننان كەيىن دارىگەرلەر ماسكەۋلىك حيرۋرگ دەنيس رەماشيەۆسكيمەن بىرلەسىپ اياقتى قالپىنا كەلتىرۋ وپەراسياسىنا كىرىسىپ كەتتى. كۇردەلى وتا مىندەتتى الەۋمەتتىك مەديسينالىق ساقتاندىرۋ شەڭبەرىندە جاسالدى.
«تەرىسى، بۇلشىق ەتتەرى مەن سۇيەك تىندەرىنىڭ كوپ مولشەردە زاقىمدانعانىن ەسكەرە وتىرىپ ماسكەۋلىك ارىپتەسىمىزبەن بىرگە پلاستيكالىق قالپىنا كەلتىرۋ وپەراسياسىن جاساۋ تۋرالى شەشىم قابىلدادىق. بىلايشا ايتقاندا، جانسىزدانعان تىندەر الىپ تاستالدى. جىلىنشىكتىڭ ارت جاعىنداعى بۇلشىق ەتتەردى الدىڭعى جاعىنا اۋىستىرىپ، سانىنان تەرى الىپ جالعادىق. وپەراسيانىڭ بىرەگەيلىگى دە وسىندا»، – دەيدى مامان.
ايتۋىنشا، ءقازىر اۋتودەرموپلاستيكا ادىسىمەن جالعانعان تەرى ورنىقتى، پاسيەنتتىڭ جاعدايى جاقسى. ءقازىر ول اۋرۋحانادان شىعۋعا دايىندالىپ جاتىر.