بۇل سۇراققا دەنساۋلىق ساقتاۋ ءمينيسترى اقمارال ءالنازاروۆا جاۋاپ بەردى.
قازاقستاندا سۇرانىسقا يە دارىلەردىڭ باعاسى ءوسۋى مۇمكىن، دەپ حابارلايدى Almaty-akshamy.kz
دەنساۋلىق ساقتاۋ ءمينيسترى ۆەدومستۆونىڭ ەڭ تانىمال 1728 دارى-دارمەكتى ەركىن اينالىمعا شىعارۋ جوسپارى تۋرالى ايتتى.
«وتكەن جىلى دەنساۋلىق ساقتاۋ مينيسترلىگى العاش رەت دارى-دارمەكتىڭ 303 تۇرىنە باعانى رەتتەۋدەن باس تارتتى. بۇل تۋرالى بىزدەن بيزنەس پەن مەديسينا قاۋىمداستىعى ءوتىندى. ءبىر جىل ىشىندە باعا 14-15 پايىزعا ءوستى. بيىل 1728 دارى-دارمەك تۇرىنە باعانى رەتتەۋدەن باس تارتۋدى جوسپارلاعان بولاتىنبىز. ءبىراق ءبىز بۇل پروسەستى توقتاتىپ، ساراپتاما جۇرگىزۋ تۋرالى شەشىم قابىلدادىق»، - دەدى ءالنازاروۆا.
ونىڭ ايتۋىنشا، دەنساۋلىق ساقتاۋ مينيسترلىگى ەندى دارى-دارمەك باعاسىن مەملەكەتتىك رەتتەۋدەن باس تارتۋ ەلدەگى ينفلياسياعا قالاي اسەر ەتەتىنىن تالداۋعا نيەتتى.
«جالپى، ءبىز ەكىنشى جارتىجىلدىقتا دارى-دارمەكتىڭ وسى تۇرلەرىنە باعانى رەتتەۋدى كەزەڭ-كەزەڭىمەن الىپ تاستاۋدى جوسپارلاپ وتىرمىز. بۇل پرەپاراتتارعا انتيبيوتيكتەر، انتيگيستاميندەر جانە جوتەلگە قارسى پرەپاراتتاردى قوسا العاندا، حالىق اراسىندا ەڭ ءجيى ساتىپ الىناتىن جانە سۇرانىسقا يە دارىلەر بار»، - دەدى مينيستر.