ەل بويىنشا QR-كود ارقىلى تەگىن دارى-دارمەك بەرۋ جوباسى ىسكە قوسىلدى، بۇل جالعان رەسەپتىلەردى جازۋ جانە ۇرلاۋ تاۋەكەلدەرىن ازايتادى، دەپ حابارلايدى aqshamnews.kz
2024 جىلى سىبايلاس جەمقورلىققا قارسى ءىس-قيمىل اگەنتتىگى دارىلىك زاتتار مەن مەديسينا بۇيىمدارىن ساراپتاۋ ۇلتتىق ورتالىعىنىڭ (دزسۇو) قىزمەتىندەگى سىبايلاس جەمقورلىق تاۋەكەلدەرىنە سىرتقى تالداۋ جۇرگىزدى.
بۇعان دەيىن "سك-فارماسيا" ۇيىمىندا جۇرگىزىلگەن تالداۋ ساتىپ الۋ قۇنىنىڭ نەگىزسىز ارتۋىمەن بايلانىستى ەلەۋلى تاۋەكەلدەردى انىقتاعان بولاتىن.
بەلگىلى بولعانداي، بۇل ماسەلەلەر تىكەلەي دزسۇو قىزمەتىمەن بايلانىستى.
نەگىزگى تاۋەكەلدەر – شىعىندار مەن جەتكىزۋشىلەردىڭ ۇستەمەاقىسى تۋرالى اقپاراتتىڭ جابىقتىعى، اقپاراتتىق جۇيەلەردىڭ بولشەكتەنۋى جانە دەرەكتەردى قايتا تەكسەرۋ مەحانيزمىنىڭ بولماۋى.
دەنساۋلىق ساقتاۋ مينيسترلىگىنىڭ بۇيرىقتارى جەتكىزۋشىلەردىڭ كولىك شىعىندارىنا، ماركەتينگكە جانە ساپانى باعالاۋعا نەگىزسىز ۇستەمەاقى ەنگىزۋ ارقىلى دارى-دارمەك باعاسىن قالىپتاستىرۋعا مۇمكىندىك بەرگەن.
ناتيجەسىندە دارى-دارمەكتەردىڭ تىركەۋدەن وتكەننەن كەيىن ءدارىحانالار سورەلەرىنە تۇسۋىنە دەيىنگى باعاسى ەكى ەسەدەن استام وسكەن.
وسىدان ۇلكەن فارماسيەۆتيكالىق كومپانيالار ارتىق پايدا تاپقان.
اگەنتتىك دەنساۋلىق ساقتاۋ مينيسترلىگىنە نەگىزسىز ۇستەمەاقىلاردى جويۋ جانە مونيتورينگ جۇرگىزۋگە ارنالعان ءبىرىڭعاي اقپاراتتىق جۇيەنى ەنگىزۋ بويىنشا ۇسىنىستار ەنگىزدى.
پرەزيدەنت اكىمشىلىگى باسشىسىنىڭ بۇيرىعىمەن وسى سالادا باعا بەلگىلەۋ جۇيەسىن سيفرلاندىرۋ بويىنشا جۇمىس توبى قۇرىلدى.
قازىرگى ۋاقىتتا سىبايلاس جەمقورلىققا قارسى قىزمەتتىڭ ۇسىنىستارىنا سايكەس دارى-دارمەكتەردىڭ شەكتى باعاسى مەن ساتىپ الۋ تارتىبىنە قاتىستى دەنساۋلىق ساقتاۋ ءمينيسترىنىڭ ءۇش بۇيرىعىنا وزگەرىستەر ەنگىزىلدى.
ناتيجەسىندە نەگىزسىز ۇستەمەاقىلار الىنىپ تاستالدى، بۇل كەيبىر دارى-دارمەكتەردىڭ باعاسىنىڭ تومەندەۋىنە وڭ اسەر ەتەدى.