بۇگىن، 27 قاڭتار 2025 جىلى، الماتىداعى 28 گۆاردياشى-پانفيلوۆشىلار ساياباعىندا لەنينگرادتىڭ قورشاۋدان بوساعانىنا 81 جىل تولۋىنا وراي ەسكە الۋ ميتينگى ءوتتى، دەپ حابارلايدى aqshamnews.kz.
1941 جىلدىڭ 8 قىركۇيەگىنەن 1944 جىلدىڭ 27 قاڭتارىنا دەيىن 872 كۇنگە سوزىلعان بۇل بلوكادا – ۇلى وتان سوعىسى تاريحىنداعى ەڭ اۋىر گۋمانيتارلىق اپاتتاردىڭ ءبىرى. قورشاۋ كەزىندە ميلليونداعان بەيبىت تۇرعىن مەن قالانىڭ قورعاۋشىلارى قازا تاپتى. بۇل وقيعا ادامزاتتىڭ قايسارلىعى مەن رۋحىنىڭ سىنالۋىنىڭ سيمۆولى رەتىندە تاريحتا ماڭگى ساقتالادى.
شاراعا قالانىڭ سەگىز اۋدانىنىڭ ارداگەرلەر كەڭەستەرىنىڭ وكىلدەرى، رەسەي فەدەراسياسىنىڭ باس كونسۋلدىعى، اۋعان سوعىسىنىڭ ارداگەرلەرى، قوعامدىق ۇيىمدار مەن پارتيالاردىڭ وكىلدەرى قاتىستى. ولار لەنينگرادتى قورعاۋ جولىندا قازا تاپقان بەيبىت تۇرعىندار مەن جاۋىنگەرلەردى ءبىر مينۋت ۇنسىزدىكپەن ەسكە الدى.
الماتىدا «لەنينگراد بلوكاداشىلارىنىڭ قالالىق ۇيىمى» قوعامدىق بىرلەستىگى جۇمىس ىستەيدى. بۇل ۇيىمعا سول ءبىر اۋىر كەزەڭدە لەنينگرادتان امان قالعان بۇرىنعى تۇرعىندار مۇشەلىك ەتەدى. ۇيىمنىڭ جەتەكشىسى مارينا نيكولايەۆنا سەرگييەۆا – قورشاۋ كەزىندە «ءومىر جولى» ارقىلى لادوگا كولىنىڭ ۇستىمەن قازاقستانعا ەۆاكۋاسيالانعانداردىڭ ءبىرى. ول ءوزىنىڭ بالالىق شاقتاعى ەستەلىكتەرىمەن ءبولىستى. بومبالاۋ، ۇرەي جانە ۇزاق جولداعى قيىندىقتارعا قاراماستان، اناسىنىڭ قايسارلىعى ارقاسىندا مارينا نيكولايەۆنا وتباسىمەن بىرگە امان قالعان.
بۇگىندە مارينا نيكولايەۆنا ءوزىنىڭ جاسىنا قاراماستان، قوعامدىق-ساياسي بەلسەندىلىگىن جالعاستىرىپ، ەل پرەزيدەنتىنىڭ ساياساتىن قولداۋ، تۇراقتىلىقتى ساقتاۋ جانە جاستاردى پاتريوتتىق رۋحتا تاربيەلەۋ باعىتىندا جۇمىستار اتقارۋدا. ول قوعامنىڭ بەيبىتشىلىگى مەن بىرلىگىنە ەرەكشە ءمان بەرەدى جانە بۇل قۇندىلىقتاردى ۇرپاقتان ۇرپاققا جەتكىزۋدى ءوز مىندەتى دەپ سانايدى.
شارا بارىسىندا 28 گۆاردياشى-پانفيلوۆشىلار ساياباعىندا جينالعاندار ەستەلىك گۇل شوقتارىن قويىپ، قورشاۋ قۇرباندارىن ەسكە الدى. بۇل كۇن – ادامزات تاريحىنداعى ەڭ اۋىر، ءبىراق باتىرلىققا تولى وقيعالاردىڭ ءبىرى رەتىندە جادىمىزدا قالماق.