دارى-دارمەك قوبديشاسىنىڭ قۇرامى جاڭاردى

دەنساۋلىق ساقتاۋ مينيسترلىگى مەديسينالىق العاشقى كومەك كورسەتۋ ءۇشىن دارى-دارمەك قوبديشاسىنىڭ قۇرامىن جاڭارتتى.

بۇل تۋرالى مينيسترلىكتىڭ باسپا ءسوز قىزمەتى مالىمدەدى، دەپ حابارلايدى Almaty-akshamy.kz

«تۇركيا، گەرمانيا، اقش، وڭتۇستىك كورەيا جانە باسقا ەلدەردىڭ حالىقارالىق تاجىريبەسىن تالداۋدى ەسكەرە وتىرىپ، دارى-دارمەك قوبديشاسىنىڭ قۇرامىنا مىنالار كىرەدى: داكە تاڭعىشتار، ەلاستيكالىق بينتتەر، تاڭعىش پاكەت، مەديسينالىق بۇلاسىر، دوعال قايشى، مەتالل، وكپەنى جاساندى جەلدەتۋگە ارنالعان قالتا ماسكاسى، تاڭۋعا ارنالعان بانداج، قۇتقارۋ كورپەسى، ءبىر رەتتىك مۇز پاكەتى، ىسقىرىق، شام، دارى-دارمەك قوبديشاسىنا ارنالعان فۋتليار، بلوكنوت، قارىنداش، دىمقىل مايلىقتار، قولعاپتار، شەندەۋىشتەر جانە زارداپ شەككەن ادامعا مەديسينالىق العاشقى كومەك كورسەتۋ بويىنشا پايدالانۋ جونىندەگى ۇسىنىمدار»، - دەپ جازىلعان مينيسترلىك حابارلاماسىندا.

دارى-دارمەك قوبديشاسى جەكە قاجەتتىلىكتەر مەن سۇرانىمدارعا سايكەس پايدالانۋشىنىڭ قالاۋىنشا تولىقتىرىلادى.

ونەركاسىپتىك وبەكتىلەردە دارى-دارمەك قوبديشاسىنىڭ قۇرامى قولدانۋ جونىندەگى نۇسقاۋلىقپەن قوسا، زياندى نەمەسە ءقاۋىپتى وندىرىستىك فاكتورلارعا بايلانىستى جاراقاتتى شۇعىل وڭدەۋگە ارنالعان قۇرالدارمەن (انتيدوتتارمەن) تولىقتىرىلادى.

دارى-دارمەك قوبديشاسىنىڭ جاڭا قۇرامى ق ر دەنساۋلىق ساقتاۋ ءمينيسترىنىڭ 2023 جىلعى 10 شىلدەدەگى بۇيرىعىمەن بەكىتىلگەن.