2026 جىلى الماتى قالاسىندا قالا اكىمى دارحان ساتىبالدىنىڭ باستاماسى مەن تاپسىرمالارى اياسىندا ەنگىزىلەتىن جاڭا جوبالاردىڭ ىشىندە حالىقتىق، ينكليۋزيۆتىك جانە وسى زامانعى سپورتتى دامىتۋعا ەرەكشە نازار اۋدارىلعان.
«سپورت – دوستىق الاڭى» جوباسى بارلىق اۋداندا كەڭ اۋقىمدا ىسكە اسىپ، تۇرعىندار مەن قالا قوناقتارىنىڭ وعان بەلسەندى تۇردە قاتىسۋىن قامتاماسىز ەتپەك. الماتى قالاسىنىڭ سپورت باسقارماسىنىڭ باسشىسى دارحان نۇرحان ۇلى وڭىرلىك كوممۋنيكاسيالار قىزمەتىندە وسىلاي دەپ حابارلادى.
ناۋرىز ايىنان باستاپ Almaty Marathon جوباسىمەن بىرلەسىپ «ACTIVE CITY HUB» باستاماسى ىسكە قوسىلىپ، ءار جەكسەنبى كۇنى ساعات 08:00-دەن 12:00-گە دەيىن مەديا تۇلعالار مەن فيتنەس جاتتىقتىرۋشىلارى قاتىساتىن شەبەرلىك ساباقتارى مەن شاعىن ءىس-شارالار وتپەك.
«ءبىز بۇل ءىس-شارالارعا 10 000-نان استام قالا تۇرعىنى قاتىسادى دەپ وتىرمىز»، – دەيدى دارحان نۇرحان ۇلى.
سونىمەن قاتار، قازاقستاننىڭ شوۋ-بيزنەس جۇلدىزدارىنىڭ كوماندالارى قاتىساتىن Media Basket باسكەتبول مەديا-ليگاسى دا باستالادى. بۇل جوبا باسكەتبولدى تانىمال ەتىپ، سپورت، مادەنيەت پەن مەديا اراسىنداعى بايلانىستى نىعايتا ءتۇسۋ ءۇشىن قولعا الىنىپ وتىر.
«BLAST PREMIER BOUNTY ALMATY» كيبەرسپورت ءتۋرنيرىن وتكىزۋ دە ويلاستىرىلىپ جاتىر. ءقازىر جارىستىڭ كۇنى مەن وتەتىن ورنى انىقتالدى.
«بۇل ءىس-شارا قالانىڭ كيبەرسپورت كارتاسىندا ماڭىزدى ورىن الىپ، ويىنشىلار مەن كورەرمەندەردىڭ نازارىن اۋدارادى»، – دەدى سپورت باسقارماسىنىڭ باسشىسى.
2026 جىلى ەرەكشە بالالاردى سپورتقا تارتۋعا ەرەكشە كوڭىل بولىنەدى. ارنايى ءبىلىم بەرۋگە مۇقتاج بالالاردىڭ وڭالۋى، الەۋمەتتىك بەيىمدەلۋى مەن سپورتقا قاتىسۋىنا باعىتتالعان بالالاردىڭ پاراليمپيادالىق سپورتىن دامىتۋ باعدارلاماسى دا وسىمەن قاتارلاسا ازىرلەنىپ جاتىر.
گارۆارد پەن وكسفورد ۋنيۆەرسيتەتى قاتىساتىن دۇنيەجۇزىلىك شاحمات ۋنيۆەرسياداسىن وتكىزۋ، 20 ەل قاتىساتىن اۋەسقوي ۆەلوسپورتتان الەم چەمپيوناتىن ۇيىمداستىرۋ، سونداي-اق ستۋدەنتتىك ليگانى كوللەدجدەر ليگاسىنا كەڭەيتىپ، شامامەن 88 كوللەدج بەن 7 مىڭ ستۋدەنتتى قامتۋ جاعى دا قالانىڭ جوسپارىنا كىرگەن.
«ءبىزدىڭ ماقساتىمىز – سپورتتى قالانىڭ بارلىق تۇرعىندارى ءۇشىن قولجەتىمدى، قىزىقتى ەتۋ. الماتىلىقتاردىڭ ءارقايسىسى دەنە شىنىقتىرۋمەن اينالىسۋعا مۇمكىندىك الۋى كەرەك»، – دەپ تۇيىندەدى دارحان نۇرحان ۇلى.