الماتى اكىمدىگىندە قالا اكىمى دارحان ساتىبالدى Orascom Investment Holding حولدينگىنىڭ ءتوراعاسى، حالىقارالىق ينۆەستور ناگيب ساۆيريسپەن كەزدەستى.
دارحان ساتىبالدى الماتىنىڭ ساۋدا-ەكونوميكالىق بايلانىسى 130-دان استام ەلمەن ورناعانىن اتاپ ءوتتى. قالا كوپجاقتى حالىقارالىق ىنتىماقتاستىقتىڭ وڭىرلىك ورتالىعى سانالادى. الماتىدا 115 حالىقارالىق ۇيىم مەن ديپلوماتيالىق وكىلدىكتىڭ، ونىڭ ىشىندە بىرىككەن ۇلتتار ۇيىمىنىڭ 18 وڭىرلىك اگەنتتىگىنىڭ كەڭسەسى ورنالاسقان. سونداي-اق، قازاقستانداعى ەكىنشى دەڭگەيلى بانكتەردىڭ 90%-ىنىڭ باس كەڭسەسى ءدال وسى شاھاردا شوعىرلانعان. بۇدان بولەك، ەل ەكونوميكاسىنىڭ 22%-دان استامى الماتىعا تيەسىلى، رەسپۋبليكالىق بيۋدجەتكە تۇسەتىن سالىق تۇسىمدەرىنىڭ تورتتەن بىرىنەن استامىن قامتاماسىز ەتەدى.
كەزدەسۋ بارىسىندا قالا اكىمى تۋريزم مەن كاسىپكەرلىكتى دامىتۋ باسىم باعىتتاردىڭ ءبىرى ەكەنىن ايتىپ، بيزنەس جۇرگىزۋگە قولايلى جاعداي جاسالعانىن جەتكىزدى.
سونداي-اق، سوڭعى ءۇش جىلدا الماتىعا كەلەتىن تۋريستەر سانى 92%-عا ارتقانى، ال قاربالاس ماۋسىمدا قوناقۇيلەردىڭ جۇكتەمەسى 90%-عا دەيىن جەتەتىنى ايتىلدى. بۇل كورسەتكىشتەر قالادا تۋريستىك ينفراقۇرىلىمدى ودان ءارى دامىتۋعا سۇرانىستىڭ جوعارى ەكەنىن ايعاقتايدى.
كەزدەسۋ قورىتىندىسى بويىنشا ناگيب ساۆيريس الماتىنىڭ ينۆەستيسيالىق الەۋەتىن تەرەڭىرەك زەردەلەۋگە جانە ىنتىماقتاستىقتىڭ بولاشاعى زور باعىتتارى بويىنشا ديالوگتى جالعاستىرۋعا قىزىعۋشىلىق ءبىلدىردى.