قالا اكىمى سايران سۋ قويماسىنداعى تارتىپسىزدىكتى جويۋدى تالاپ ەتتى، دەپ حابارلايدى aqshamnews.kz
الماتىدا وتكەن اپپاراتتىق كەڭەستىڭ باسقوسۋىندا قاڭتار-مامىر ايلارىندا بيۋدجەتتى جۇزەگە اسىرۋ جانە الەۋمەتتىك-ەكونوميكالىق دامۋ قورىتىندىلارى، سونداي-اق "تازا قازاقستان" باعدارلاماسىنىڭ ورىندالۋ بارىسى پىسىقتالدى.
قالا اكىمى دارحان ساتىبالدى سايران سۋ قويماسىنىڭ سانيتارلىق جاعدايىنا ەرەكشە ءمان بەردى. ەكولوگيا، قوعامدىق كەڭىستىكتى دامىتۋ مەن پوليسيا باسقارمالارىنا قۇقىق بۇزۋشىلارعا باقىلاۋ مەن قاتاڭ شارانىڭ جوقتىعى سىنالدى. مەردىگەرگە ورىن العان بارلىق كەمشىلىكتەردى جويۋ ءۇشىن سوڭعى ەسكەرتۋ جاسالدى.
اۋدان اكىمدەرىنە قالانىڭ پروبلەمالىق ۋچاسكەلەرىن قوقىستان تازارتىپ، بىتەلگەن ارىقتاردى رەتكە كەلتىرۋ تاپسىرىلدى. جۇمىس ەرەكشە باقىلاۋدا بولادى.
سونداي-اق، قالا باسشىسى الماتىنىڭ كۇزگى كوگالداندىرۋ جوسپارىن ۇسىنۋدى جانە اۋانى لاستايتىن كولىككە باقىلاۋدى كۇشەيتۋدى تاپسىردى.
2030 جىلعا قاراي ءجوو-نى ەكى ەسەگە ارتتىرۋ جوسپارىن ازىرلەپ، 2027-2028 جىلدارعا ارنالعان ينۆەستيسيالاردىڭ ءوسۋ كوزدەرىن انىقتاۋ مىندەتى قويىلدى.