الماتى اكىمى دارحان ساتىبالدى جۇمىس ساپارىمەن پوليسيا دەپارتامەنتىنە باردى. ساپار بارىسىندا ول ىشكى ىستەر ورگاندارىنىڭ قىزمەتىمەن، دەپارتامەنت عيماراتتارىندا جۇرگىزىلىپ جاتقان جوندەۋ جۇمىستارىنىڭ بارىسىمەن، سونداي-اق جەرگىلىكتى بيۋدجەت ەسەبىنەن الىنعان جاڭارتىلعان تەحنيكامەن تانىستى.
قاۋىپسىزدىكتى ارتتىرۋعا جانە پوليسيا جۇمىسىنىڭ تيىمدىلىگىن كوتەرۋگە باعىتتالعان زاماناۋي اۆتوكولىكتەر مەن ارنايى قۇرالدار كورسەتىلدى.
اكىم سونداي-اق پوليسيا دەپارتامەنتىنىڭ جەدەل باسقارۋ ورتالىعىندا (جبو) بولىپ، بەينەباقىلاۋ جۇيەسىنىڭ جۇمىسىمەن جانە قوعامدىق ءتارتىپتى قامتاماسىز ەتۋدە سيفرلىق تەحنولوگيالاردى ەنگىزۋ بارىسىمەن تانىستى.
الماتىداعى جبو 2000 جىلدىڭ جەلتوقسانىندا اشىلىپ، قازاقستانداعى العاشقى ورتالىق بولدى. بۇگىندە مۇندا تاۋلىك بويى 28 قىزمەتكەر جۇمىس ىستەيدى. جۇيەگە 53 مىڭ كامەرا قوسىلعان، ولاردىڭ ىشىندە بەت-الپەتتى تانۋ فۋنكسياسى بار قۇرىلعىلار دا بار. يەلەرىنىڭ كەلىسىمىمەن مۇنداي تەحنولوگيالار ويىن-ساۋىق ورىندارىندا — بارلار مەن مەيرامحانالاردا دا ورناتىلادى. ولار قۇقىق بۇزۋشىلىقتىڭ الدىن الۋعا جانە ىزدەۋدە جۇرگەن ازاماتتاردى انىقتاۋعا قولدانىلادى. جىل سوڭىنا دەيىن Target پلاتفورماسىنا تاعى 8 مىڭ كامەرانى قوسۋ جوسپارلانعان.
دارحان ساتىبالدى قالا تۇرعىندارىنىڭ قاۋىپسىزدىگى باستى باسىمدىق ەكەنىن اتاپ ءوتىپ، پوليسيانىڭ ماتەريالدىق-تەحنيكالىق بازاسىن نىعايتۋدىڭ جانە حالىقتىڭ قۇقىق قورعاۋ ورگاندارىنا دەگەن سەنىمىن ارتتىرۋدىڭ ماڭىزدىلىعىن باسا ايتتى.
دەپارتامەنتتى ارالاۋعا قالا اكىمى اپپاراتىنىڭ باسشىلارى، الماتى ءماسليحاتىنىڭ دەپۋتاتتارى جانە پوليسيا دەپارتامەنتىنىڭ باسشىلىق قۇرامى قاتىستى.