الماتى اكىمى دارحان ساتىبالدى Google كورپوراسياسىنىڭ ەۋروپا مەن ورتالىق ازياداعى ءبىلىم بەرۋ باعىتىنا جانە EMEA وڭىرىندەگى جوعارى ءبىلىم سالاسىنا جەتەكشىلىك ەتەتىن اننا ارتەميەۆا حانىممەن رەسمي كەزدەسۋ وتكىزدى.
كەزدەسۋ بارىسىندا قالا مەكتەپتەرىنىڭ ءبىلىم بەرۋ جۇيەسىنە سيفرلىق قۇرالداردى ەنگىزۋ ماسەلەلەرى تالقىلاندى.
دارحان ساتىبالدى سيفرلىق تەحنولوگيالاردىڭ قوعام دامۋىنداعى، اسىرەسە جاس ۇرپاق تاربيەسىندەگى ماڭىزىن ەرەكشە اتاپ ءوتتى.
«سيفرلاندىرۋ – بۇل جاي عانا ينفراقۇرىلىمدى جاڭارتۋ ەمەس، بۇل ءبىلىم بەرۋدەگى كوزقاراستى تۇبەگەيلى وزگەرتۋ. ول وقۋشىلاردىڭ سىني ويلاۋىن، سيفرلىق ساۋاتتىلىعىن ارتتىرىپ، جاساندى ينتەللەكت پەن بۇلتتى تەحنولوگيالاردى مەڭگەرۋگە جول اشادى»، – دەدى اكىم.
الماتىدا Google for Education پلاتفورماسىنىڭ پيلوتتىق جوباسى ءساتتى جۇزەگە اسىپ، ونىڭ اياسىندا قالانىڭ بارلىق مەكتەبىندەگى مۇعالىمدەر وقۋدان ءوتتى. 2025 جىلى قىركۇيەك ايىنان باستاپ Google for Education Fundamental Plus دەپ اتالاتىن پلاتفورمانىڭ جاڭا، كەڭەيتىلگەن نۇسقاسى ەنگىزىلەدى. جوبا 18 مىڭنان استام ءمۇعالىمدى جانە 9-10 سىنىپتا وقيتىن 20 مىڭنان اسا وقۋشىنى قامتيدى.
«Google كومپانياسىنىڭ ءبىلىم بەرۋ سالاسىنداعى شەشىمدەرى قالانىڭ وقۋ جۇيەسىن سيفرلىق تۇرعىدا جاڭعىرتۋدا ەرەكشە ءرول اتقارادى»، – دەدى دارحان ساتىبالدى.
كەزدەسۋدە الداعى ۋاقىتتا اشىلاتىن Gemini Academy Almaty جوباسىنا دا ايرىقشا ءمان بەرىلدى. بۇل حالىقارالىق دەڭگەيدەگى سيفرلىق ءبىلىم ورتالىعى بولماق. مۇندا ۇستازدار مەن وقۋشىلار جاساندى ينتەللەكت، ماشينالىق وقىتۋ، بۇلتتى تەحنولوگيا سىندى زاماناۋي باعىتتار بويىنشا ءبىلىم الىپ، داعدىسىن دامىتا الادى. اكادەميا EdTech جانە سيفرلىق ساۋاتتىلىق سالاسىنداعى جەتەكشى باستاما رەتىندە تانىلىپ، قازاقستان مەن بۇكىل ورتالىق ازيا وڭىرىنە سيفرلىق پەداگوگتاردى دايارلايتىن ورتالىققا اينالماق.
سونداي-اق، كەزدەسۋدە سيفرلىق قاۋىپسىزدىك، مۇعالىمدەردىڭ كاسىبي دامۋى، جاساندى ينتەللەكتتى وقۋ ۇدەرىسىنە ەنگىزۋ جانە وقۋشىلاردىڭ وقۋ بەلسەندىلىگىن تالداۋ قۇرالدارىن قولدانۋ سىندى ماسەلەلەر دە تالقىلاندى.
اننا ارتەميەۆا الماتى اكىمدىگىنىڭ جوعارى دەڭگەيدەگى ىنتاسىن اتاپ ءوتىپ، الداعى ۋاقىتتا دا سەرىكتەستىكتى نىعايتۋعا ءازىر ەكەنىن جەتكىزدى.
كەزدەسۋ سوڭىندا تاراپتار ورتاق ءبىلىم بەرۋ باستامالارىن بىرلەسە جۇزەگە اسىرۋعا جانە الماتىداعى سيفرلاندىرۋ تاجىريبەسىن كەڭەيتۋگە ءوزارا قىزىعۋشىلىق ءبىلدىردى.