دارحان ساتىبالدى المالى اۋدانىنداعى كارىز جۇيەلەرىنىڭ قۇرىلىسىنا جاۋاپتى مەردىگەرگە مەرزىم مەن ساپانى قاتاڭ ساقتاۋ جونىندە تالاپ قويدى، - دەپ حابارلايدى aqshamnews.kz.
الماتى اكىمى دارحان ساتىبالدى جۇمىس ساپارى بارىسىندا المالى اۋدانىنداعى تۋركەبايەۆ كوشەسىندە كىشى اباي كوشەسىنەن قاراساي باتىر كوشەسىنە دەيىنگى ارالىقتا جۇرگىزىلىپ جاتقان كارىز جەلىلەرىنىڭ قۇرىلىسى بارىسىمەن تانىستى.
جوباعا اۋدان اكىمدىگى تاپسىرىس بەرگەن. 15 شاقىرىم ينجەنەرلىك جەلىلەر تارتىلىپ، شامامەن 1 700 ابونەنت، ياعني 6 800-دەن اسا تۇرعىن كارىز جۇيەسىنە قوسىلماق. 2024 جىلى بۇل جۇمىس ءىشىنارا اياقتالىپ، التى كوشەدە 5 شاقىرىمعا جۋىق جەلى تارتىلدى. 2025 جىلى ۇزىندىعى 10 شاقىرىم بولاتىن 15 كوشەدە قۇرىلىس جوسپارلانعان. ءقازىر سول كوشەلەردىڭ 10-ىندا جۇمىس باستالىپ كەتتى.
قالا باسشىسى مەردىگەر ۇيىمعا بارلىق جۇمىستى 1 قىركۇيەككە دەيىن اياقتاۋدى تاپسىردى.
«سىزدەردەن ساپا مەن مەرزىمدى تالاپ ەتەمىز. كەپىلدىك مەرزىمى – 5 جىل. ەگەر قانداي دا ءبىر اپات بولسا، سىزدەر قالپىنا كەلتىرەسىزدەر»، – دەدى دارحان ساتىبالدى.
جوبانىڭ نەگىزگى ماقساتى تۇرعىنداردىڭ تۇرمىس ساپاسىن جاقسارتۋ جانە اۋداننىڭ ينجەنەرلىك ينفراقۇرىلىمىن جاڭعىرتۋ.
سونىمەن قاتار جۇمىس ساپارى اياسىندا الماتى اكىمى كۇردەلى جوندەۋ جۇرگىزىلىپ جاتقان №3 قالالىق ەمحانا عيماراتىنا باردى. بۇگىندە ىشكى ينجەنەرلىك جۇيەلەر، لينەارلى پانەلدەردەن قاپتالعان قاسبەتتى ورناتۋ، بولمەارالىق قابىرعا جاساۋ، ىشكى ارلەۋ، كافەل توسەۋ، ەسىك-تەرەزە ورناتۋ مەن اۋلانى كوركەيتۋ جۇمىستارى اياقتالدى. ءقازىر نىسان 95% دايىن.