الماتىنىڭ جاڭا دارحان ساتىبالدى ءاربىر الماتىلىقتىڭ مۇددەسى ءۇشىن ءوز مىندەتتەرىن جاۋاپتى جانە كاسىبي ورىنداۋعا كەپىلدىك بەرەتىنىن ايتتى، دەپ حابارلايدى aqshamnews.kz.
جاڭا تاعايىندالعان اكىم الماتىنىڭ ەلىمىزدىڭ ءىرى مەگاپوليسى عانا ەمەس، سونىمەن قاتار مادەني، ەكونوميكالىق، عىلىمي جانە ءبىلىم بەرۋ ورتالىعى ەكەنىن اتاپ ءوتتى. ونىڭ ايتۋىنشا الماتى شاھارى باي تاريحى بار، رۋحى ەرەكشە جانە ۇلكەن مۇمكىندىكتەر قالاسى.
"سونىمەن قاتار، قالامىزدا ءبىرقاتار سىن-قاتەرلەر بار. بۇل، ەڭ الدىمەن، ەكولوگيالىق پروبلەمالار، كولىك جۇكتەمەسى، ساپالى جانە تۇراقتى سۋمەن جابدىقتاۋ ماسەلەلەرى، ينجەنەرلىك جەلىلەردىڭ توزۋى، تىعىز قۇرىلىس.
ءبىزدىڭ الدىمىزدا قالانىڭ ودان ءارى تۇراقتى دامۋى جانە ءاربىر الماتىلىقتىڭ ءومىر ءسۇرۋ ساپاسىنا بايلانىستى مىندەتتەر تۇر"، - دەدى دارحان ساتىبالدى.
الماتى قالاسىنىڭ اكىمى جۇمىسىنىڭ ءتۇيىندى باسىمدىقتارى نەگە نەگىزدەلەتىنىنە توقتالدى.
كولىك جۇيەسىن دامىتۋ جانە ەكولوگيانى جاقسارتۋ
قوعامدىق كولىكتى دامىتۋ اكىمدىك قىزمەتىنىڭ باسىم باعىتتارىنىڭ ءبىرى بولىپ قالا بەرەدى.
كۇندەلىكتى كولىك كەپتەلىستەرىمەن، جولداردىڭ شامادان تىس جۇكتەلۋىمەن، اتموسفەرالىق اۋانىڭ لاستانۋىمەن بايلانىستى ماسەلەلەردى شەشۋ ءۇشىن زاماناۋي جانە ەكولوگيالىق اۆتوبۋستاردى ساتىپ الۋ، اۆتوبۋس جانە تروللەيبۋس جەلىلەرىن كەڭەيتۋ، مارشرۋتتاردى وڭتايلاندىرۋ جانە قوزعالىس ارالىقتارىن قىسقارتۋ قامتاماسىز ەتىلەتىن بولادى. سونداي-اق، مەتروپوليتەن قۇرىلىسى قارقىندى جۇرگىزىلىپ، BRT جەلىلەرى كەڭەيتىلەدى.
"الماتى ەكولوگيالىق تۇراقتى مەگاپوليسكە اينالۋى ءتيىس. ول ءۇشىن ساپالى كوگالداندىرۋ، قوعامدىق كەڭىستىكتەردى دامىتۋ، قوقىستاردى بولەك جيناۋ جانە كادەگە جاراتۋ، ەنەرگيا تيىمدىلىگى جانە تابيعي رەسۋرستاردى ۇتىمدى پايدالانۋ جونىندەگى باستامانى قولداۋ، ەلەكتروموبيلدەر مەن ەكولوگيالىق تازا تەحنولوگيالارعا كوشۋ ءۇشىن ىنتالاندىرۋدى ەنگىزۋ قامتاماسىز ەتىلەدى"، - دەدى ول.
تۇرعىنداردىڭ جايلىلىعى مەن قاۋىپسىزدىگى
جايلى قالالىق ورتا بازالىق ينفراقۇرىلىمنان باستالادى.
"ءبىز كوممۋنالدىق جەلىلەر – سۋمەن قامتۋ، جىلۋمەن جابدىقتاۋ، ەلەكترمەن قامتاماسىز ەتۋ جەلىلەرىن جۇيەلى مودەرنيزاسيالاۋدى جۇرگىزەمىز.
تۇرعىن ءۇي قورى مەن قوعامدىق عيماراتتاردىڭ سەيسميكالىق قاۋىپسىزدىگىنە ەرەكشە كوڭىل بولەتىن بولامىز"، - دەدى دارحان ساتىبالدى.
اۋدانداردى اباتتاندىرۋ، اۋلالاردى، كوشە جارىعىن، تروتۋارلاردى، حالىقتىڭ ءجۇرىپ-تۇرۋى قيىن توپتارى ءۇشىن قولجەتىمدى ورتانى قۇرۋ – مۇنىڭ ءبارى ءجاي عانا ۋادە ەمەس، ناقتى مەرزىمدەرى مەن ناتيجەلەرى بار جوسپار بولادى، دەپ سەندىردى ول.
ەكونوميكانىڭ تۇراقتى دامۋى جانە كاسىپكەرلىكتى قولداۋ
الماتى – باستاماشىل جانە تاپقىر ادامداردىڭ قالاسى.
"ءبىز شاعىن جانە ورتا بيزنەسكە جاڭا قارجى قۇرالدارى، جەڭىلدەتىلگەن اكىمشىلىك راسىمدەر جانە يندۋستريالىق ايماقتاردى دامىتۋ ارقىلى قولداۋ كورسەتەمىز.
قالا IT-سالانى، ستارتاپتاردى، كرەاتيۆتى يندۋستريالاردى، تۋريستىك جانە ءبىلىم بەرۋ قىزمەتتەرىن دامىتۋ الاڭىنا اينالادى.
ءبىز پروبلەمالاردى جەدەل شەشۋ ءۇشىن بيزنەس پەن جەرگىلىكتى اتقارۋشى ورگانداردىڭ ءتيىمدى ديالوگ جۇرگىزۋ جۇيەسىن قۇرامىز"، - دەدى دارحان ساتىبالدى.
قولجەتىمدى جانە ساپالى ءبىلىم بەرۋ، دەنساۋلىق ساقتاۋ جانە الەۋمەتتىك قورعاۋ
ساپالى قىزمەتتەر تۇرعىلىقتى جەرىنە قاراماستان بارلىعىنا قولجەتىمدى بولۋ كەرەك.
"ءبىز بەلسەندى دامىپ كەلە جاتقان اۋدانداردا جاڭا مەكتەپتەر مەن بالاباقشالار سالامىز، جۇمىس ىستەپ تۇرعان وقۋ ورىندارىن جاڭعىرتىپ، سيفرلىق ءبىلىم بەرۋ تەحنولوگيالارىن ەنگىزەمىز.
دەنساۋلىق ساقتاۋ جۇيەسى ەمحانالاردى جاڭارتۋ، شالعايداعى شاعىن اۋدانداردا جاڭا مەديسينالىق پۋنكتتەر سالۋ، قىزمەتتەردى سيفرلاندىرۋ جانە سالالىق ماماندارعا قولجەتىمدىلىك ارقىلى كۇشەيتىلەتىن بولادى"، - دەدى قالا باسشىسى.
سونداي-اق، دارحان ساتىبالدىنىڭ سوزىنشە، حالىقتىڭ وسال توپتارى – كوپبالالى، قارت، مۇگەدەكتىگى بار ادامداردى الەۋمەتتىك قولداۋعا ەرەكشە نازار اۋدارىلىپ، قالا ءاربىر ادامعا كوڭىل بولەتىن بولادى.
الماتى جاستار قالاسى، ەلىمىزدىڭ ءبىلىم بەرۋ ورتالىعى، كرەاتيۆتى جانە تاپقىر جاستار تارتىلاتىن نۇكتە بولىپ سانالادى.
الماتى – ءبىلىم الۋدى، دامۋدى، جاسامپازدىقتى، ەلدى وزگەرتۋدى قالايتىندار ءۇشىن تارتىلىس نۇكتەسى.
جاڭا تاعايىنجالعان اكىمنىڭ ايتۋىنشا، جاستاردى، ولاردىڭ باستامالارىن قولداۋ، ءبىلىم الۋ، بيزنەستى باستاۋ، شىعارماشىلىق جوبالاردى ىسكە اسىرۋ ءۇشىن ينفراقۇرىلىمدى دامىتۋ — مەنىڭ جۇمىسىمنىڭ نەگىزگى باسىمدىقتارىنىڭ ءبىرى بولادى.
"ءبىز الماتىعا ءبىلىم الۋ ءۇشىن كەلگەن جاس ءوزىنىڭ بولاشاعى مەن قالانىڭ كەلەشەگىن قۇرۋ ءۇشىن وسىندا قالاتىن جاعداي جاساۋعا مىندەتتىمىز"، - دەدى دارحان ساتىبالدى.
اشىقتىق، ديالوگ جانە ەسەپ بەرۋ
دارحان ساتىبالدىنىڭ باسقارۋداعى باستى قاعيداتتارىنىڭ ءبىرى جەرگىلىكتى اتقارۋشى ورگانداردىڭ اشىقتىعى جانە تۇرعىندارمەن تۇراقتى ديالوگ جۇرگىزۋ بولماق.
قالا باسشىسىنىڭ سەندىرۋىنشە، قارقىندى دامىپ كەلە جاتقان مەگاپوليستە تەك كەرى بايلانىس، ازاماتتاردىڭ سەنىمى مەن قولداۋى ارقىلى تۇراقتى جانە ءادىل قالالىق ساياسات قۇرۋعا بولادى.
"سوندىقتان مەن اۋداندارعا — الدىن الا دايىندالعان مارشرۋتتارعا ەمەس، اۋلالارعا، مەكتەپتەرگە، بازارلار مەن كوشەلەرگە، ياعني شىنايى الماتىعا ۇنەمى شىعىپ تۇراتىن بولامىن.
مەن تۇرعىندارمەن تۇراقتى ديالوگ جۇرگىزۋ جانە قالانى دامىتۋ ءۇشىن قابىلداناتىن شەشىمدەردىڭ اشىقتىعى ارقىلى «حالىق ۇنىنە قۇلاق اساتىن مەملەكەت» تۇجىرىمداماسىنىڭ ىسكە اسىرىلۋىن قامتاماسىز ەتۋگە مىندەتتەنەمىن.
ءاربىر الماتىلىقتىڭ مۇددەسى ءۇشىن ءوز مىندەتتەرىن جاۋاپتى جانە كاسىبي ورىنداۋعا كەپىلدىك بەرەمىن. تەك كۇش-جىگەردى بىرىكتىرە وتىرىپ، ءبىز الماتىنى شىنىمەن جايلى، جاسىل، زاماناۋي جانە ءقاۋىپسىز قالاعا اينالدىرا الاتىنىمىزعا سەنىمدىمىن"، - دەدى دارحان ساتىبالدى.
بۇگىن، 2025 جىلدىڭ 24 مامىرى كۇنى پرەمەر-مينيستر ولجاس بەكتەنوۆ الماتى اكتيۆىنە جاڭا اكىم - دارحان ساتىبالدىنى تانىستىردى.
پرەزيدەنت جارلىعىمەن بۇعان دەيىن قالا اكىمى بولعان ەربولات دوسايەۆ قىزمەتىنەن بوساتىلدى.
دارحان ساتىبالدى الماتى اكىمى بولىپ تاعايىندالدى.