“UAQYT” قوعامدىق قورى الماتى قالاسى جاستار ساياساتى باسقارماسىنىڭ قولداۋىمەن اۋەزوۆ اۋدانى دەمالىس ورتالىقتارىنىڭ «AUEZOV FEST-2025» جارمەڭكەسىن ءساتتى وتكىزدى.
”ءبىزدىڭ قور اۋەزوۆ اۋدانىنداعى جاسوسپىرىمدەر مەن جاستاردىڭ بوس ۋاقىتىن ءتيىمدى وتكىزىپ، ولاردىڭ شىعارماشىلىق، زياتكەرلىك، سپورتتىق داعدىسى مەن مۇمكىندىگىن جان-جاقتى دامىتۋعا قىزمەت ەتەتىن دەمالىس ورىندارىنىڭ جۇمىسىن ۇيلەستىرىپ وتىرادى. اۋداندا 30 ۇيىرمە، سەكسيا جۇمىس ىستەيدى. ولارعا بۇگىندە 12 جاستاعى جاسوسپىرىمنەن باستاپ، 35-كە دەيىنگى جاستار قاتىسىپ ءجۇر. ءبارى تەگىن. بۇگىنگى جارمەڭكەگە 17 دەمالىس ورتالىعى كەلدى. بۇل جارمەڭكە دەمالىس ورتالىقتارىنىڭ جەتىستىگىن، سونداي-اق ۇيىرمەلەرگە قاتىسقىسى كەلەتىن جاستار ءۇشىن مۇمكىندىك الاڭىن ۇسىندى. ءقازىر جازىلىپ كەتىپ، ەرتەڭنەن باستاپ قاتىسا بەرۋىنە بولادى”، - دەيدى “UAQYT” قوعامدىق قورىنىڭ ديرەكتورى باۋىرجان ءسابيت ۇلى.
“AUEZOV FEST-2025” فەستيۆالى قالاداعى “سارىارقا” الاڭىندا ءوتتى.
وندا فەستيۆال قاتىسۋشىلارى مەن قوناقتارى ءۇشىن دەمالىس ورتالىقتارىنىڭ جارمەڭكەسى، ويىن-ساۋىق كونسەرتتىك باعدارلاماسى، دامىتۋشى “شەبەرلىك سىنىبى” جانە سپورتتىق جارىستار ۇيىمداستىرىلدى.
”ءبىزدىڭ “اR” ورتالىعىنىن تىگىن سەحى بار. ۇلتتىق كيىمدەر، تاقيا تىگەمىز. اشەكەي بۇيىمدار جاسايمىز. ءوزىمىز تىككەن وسى كيىمدەرمەن ۇلتتىق ءسان اپتالىقتارىنا شىعىپ ءجۇرمىز. بۇل - مەنىڭ ديزاينەرلىك جوبالارىمنىڭ ءبىرى. بىزگە تىگىن ونەرىمەن اينالىسقىسى كەلەتىن جاستار كوپ كەلەدى. ولاردى جاتسىنباي، بىردەن باۋىرعا تارتىپ، تىگىنشىلىكتىڭ قىر-سىرىن ۇيرەتەمىز. تىككەن بۇيىمىن كوپشىلىككە ۇسىنا، ساتا ءبىلۋدى دە ۇيرەتەمىز. بۇل ءىستى حوببي كورەتىندەر، ۋاقىتىن ءتيىمدى وتكىزگىسى كەلەتىن جاسوسپىرىمدەر دە از ەمەس. ولارعا دا ەسىگىمىز اشىق. جاستاردىڭ دامىعانى، سۇيىكتى ىسىمەن اينالىسقانى ءبىزدى ءاردايىم قۋانتادى”، - دەيدى “AR” دەمالىس ورتالىعىنىڭ جەتەكشىسى، تانىمال ديزاينەر راۋشان انۋاربەكوۆا.