پوليسيا اۋلەتى: اكە جولىن جالعاعان ءتارتىپ ساقشىسى
وتباسىنداعى ءداستۇر – ۇرپاقتار ساباقتاستىعىنىڭ بەرىك تىرەگى. اسىرەسە، بۇل ءتارتىپ ساقشىسى ماماندىعىندا ەرەكشە ماڭىزعا يە. سەبەبى قىزمەتكە ادالدىق، ار-نامىستى بيىك ۇستاۋ، كاسىبي مىندەتكە بەرىكتىك – بۇل سالاداعى باستى قۇندىلىقتار. وسىنداي اسىل مۇرانى جالعاپ كەلە جاتقان پوليسەيلەردىڭ ءبىرى – پوليسيا پودپولكوۆنيگى دارحان ابدىكارىموۆ. ونىڭ بۇل قىزمەتكە كەلۋى – اكە جولىنىڭ زاڭدى جالعاسى ىسپەتتى.
اكە جولى – ونەگە
پودپولكوۆنيك دارحان ابدىكارىموۆتىڭ اكەسى باحادير ابدىكارىموۆ ىشكى ىستەر ورگاندارىنداعى قىزمەتىن 1984 جىلى باستاعان. العاشقى ەڭبەك جولىن وڭتۇستىك قازاقستان وبلىسى ءىىد-نىڭ پاترۋلدىك پوليسياسىندا باستاعان ول، 1989 جىلدان باستاپ جامبىل وبلىستىق ءىىد-نىڭ كريمينالدىق قىزمەتىندە ابىرويمەن ەڭبەك ەتتى. كاسىبي بىلىكتىلىگىمەن قاتار، ءوزىنىڭ تاباندىلىعى، ادالدىعى، شىنايى وتانسۇيگىشتىگىمەن دە دارالانعان. ول ءىىو ارداگەرى رەتىندە جامبىل وبلىسى ءىىد ەسىرتكى بيزنەسىنە قارسى كۇرەس باسقارماسىنىڭ ءبولىم باستىعى قىزمەتىنەن 2010 جىلى پودپولكوۆنيك شەنىندە قۇرمەتتى دەمالىسقا شىقتى.
بالالىق ارمان – سانالى تاڭداۋ
دارحان ابدىكارىموۆ بالا كۇنىنەن اكەسىنە ەلىكتەپ ءوستى. اسىرەسە، بالا كۇنىندە اكەسىنىڭ فورماسىنا قاتتى قىزىققان ەكەن. ونىڭ ءوز ىسىنە دەگەن سۇيىسپەنشىلىگى مەن قوعام الدىنداعى جاۋاپكەرشىلىگىن كورىپ وسكەن ءوزى دە كەيىن بۇل ماماندىقتى ءوز ەركىمەن تاڭدادى. 2010 جىلى زاڭ ۋنيۆەرسيتەتىن اياقتاپ، تاراز قالالىق ءىىب تەرگەۋ بولىمىندە قىزمەت جولىن باستايدى. 2013 جىلدان 2022 جىلعا دەيىن جامبىل وبلىستىق ۇيىمداسقان قىلمىسقا قارسى كۇرەس باسقارماسىندا جەدەل ۋاكىل بولىپ جۇمىس ىستەدى.
بۇگىندە ونىڭ ىشكى ىستەر ورگاندارىنداعى ەڭبەك ءوتىلى – 15 جىل. وسى ۋاقىت ارالىعىندا پوليسيا پودپولكوۆنيگى رەتىندە ءتۇرلى ماراپاتتار مەن العىس حاتتارعا يە بولعان. دەسە دە، دارحان مىرزا ءۇشىن ەڭ ۇلكەن ماراپات – ول ونىڭ وتباسى.
وسىپ-ونگەن جانۇسى - اتا-اناسىنىڭ قولداۋى ەرەكشە بولعان. اسىرەسە، اناسى گۇلجامالدىڭ ارتقان سەنىمى مەن قامقورلىعى اكەسى ءۇشىن دە، ءوزى ءۇشىن قاتتى سەزىلەتىن. ءبىر وكىنىشتىسى، اناسى وتكەن جىلى مەزگىلسىز ومىردەن وتكەن. جالعىز ۇلى ءارى ماقتانىشى - دارحاننىڭ اماندىعى مەن جەتىستىگىن تىلەگەن اكەسى قاسىندا.
وتباسى – رۋحاني تىرەك
ماماندىق تاڭداۋدا قاتەلەسپەگەن دارحان مىرزانىڭ جار تاڭداۋدا دا جولى بولعان. بۇگىندە ونىڭ قاربالاس جۇمىسىنا تۇسىنىستىكپەن قاراپ، بالالاردىڭ تاربيەسىمەن اينالىسىپ وتىرعان جۇبايى - ءاسيا جان-جاقتى قولداۋ كورسەتىپ كەلەدى. جۇمىستا جەتىستىككە جەتۋىم دە وسى جانداردىڭ ارقاسى دەيدى ول.
"ىشكى تىل ءاردايىم ماڭىزدى، اسىرەسە قاۋىپ-قاتەرگە تولى قۇقىق قورعاۋ سالاسىندا وتباسىڭ ءۇشىن الاڭداماي ءجۇرۋ ءۇشىن ومىرلىك سەرىگىڭنىڭ سەنىمدى، ادال بولعانى ماڭىزدى. وتباسى – ءار ادامنىڭ بەرىك قامالى. اۋىر كۇندەردىڭ ارتىندا جاقىنىڭنىڭ جان جىلۋىن سەزىنۋ – باعا جەتپەس بايلىق. سول ءۇشىن دە مەن وتباسىمنىڭ قولداۋىنا ءاردايىم ريزامىن"، – دەيدى پودپولكوۆنيك.
"ۇلدارىڭىز دا ءسىز سياقتى اكە جولىن قۋسا، قالاي قارايسىز"؟ - دەگەن زاڭدى ساۋالعا:
"بالالاردىڭ ءبىرى اكەم سياقتى پوليسيا قىزمەتكەرى بولامىن دەپ ءجۇر. ءبىراق ءالى بالا عوي. بولاشاقتا تاڭداۋى وسى سالا ءتۇسىپ جاتسا، جوق دەپ قولىن قاقپايمىز. ءبىراق ىشتەي ونشا قالامايمىن. سەبەبى، جۇمىس جۇمىس وتە اۋىر، جەكە ومىرگە ۋاقىت جوق"، - دەپ جاۋاپ بەردى.
قوعامعا قىزمەت – باستى پارىز
2022 جىلى دارحان وتباسىمەن بىرگە ەلورداعا قونىس اۋداردى. بۇگىندە ول استانا قالاسى پد ۇيىمداسقان قىلمىسقا قارسى كۇرەس باسقارماسىنداعى ادام ساۋداسىنا قارسى كۇرەس بولىمىندە اسا ماڭىزدى ىستەر بويىنشا جەدەل ۋاكىل قىزمەتىن اتقارىپ ءجۇر. قىزمەت بارىسىندا ونداعان قىلمىستى اشىپ، تالاي تاعدىردىڭ ادىلەتتىلىككە قول جەتكىزۋىنە سەپ بولعان.
– اكەممەن ءاردايىم ماقتانامىن. ونىڭ قوعامعا پايدا اكەلەتىن قىزمەتىن كورىپ وسكەن سوڭ، مەن دە سول جولدى تاڭداعىم كەلدى. اتا-اناما ءوز جولىمدى تاڭداۋعا مۇمكىندىك بەرگەنى ءۇشىن، ءاردايىم قولداۋ كورسەتكەندەرى ءۇشىن العىسىم شەكسىز، – دەيدى دارحان ابدىكارىموۆ.
دارحان ابدىكارىموۆتىڭ ومىردە تۇيگەنى - ادام قاي جەردە قىزمەت ەتسە دە، جۇمىستى تياناقتاپ ىستەسە، ءبارى باعالانادى. ار الدىندا دا جانى تازا بولادى. وتانعا ادال قىزمەت - ول ءۇشىن قىزمەتتەگى باستى قۇندىلىق. ءقاۋىپتى قىزمەتتى تاڭداي وتىرىپ، ول كۇن سايىن ادامداردىڭ تىنىشتىعى مەن قاۋىپسىزدىگى ءۇشىن ەڭبەك ەتىپ كەلەدى. بۇگىندە ءتارتىپ ساقشىسىنىڭ باستى ارمانى - ەلگە ادال قىزمەت ەتۋ ارقىلى بالالارىنا دا ىزگىلىك پەن ادىلەت جولىن ۇيرەتۋ. ول ءۇشىن وتباسىنىڭ سەنىمى - بەرىك تىرەك، ال اكە جولى - مىزعىماس باعدار.
دارحان سياقتى ۇلاندار كوبەيسە، ەل ىرگەسى دە، حالىق سەنىمى دە نىعايا تۇسەرى انىق.