وسىدان بىرنەشە كۇن بۇرىن ءال-فارابي داڭعىلى بويىمەن كەلە جاتىپ، ينستيتۋت پەدياتريا ايالداماسىندا تۇرعان اۆتوبۋستى كوزىم شالدى. جاقىنداعاندا بايقادىم كولىك جۇرگىزۋشىسى جوق. جول ورتاسىندا جۇرگىزۋشىسىز قوعامدىق كولىكتىڭ جۇرگىزۋشىسى قايدا كەتۋى مۇمكىن. ىشىندە حالىق وتىر. سويتسەم، الگى جۇرگىزۋشى ايالداما ارتىنداعى تالداردىڭ تاساسىنان شىعىپ كەلەدى. كوشەدە قوعامدىق دارەتحانا بولماعان سوڭ دارەتكە وتىرعانىن ءتۇسىندىم. ءوز ىس-ارەكەتى ءۇشىن ۇيالعانىن بىلدىرگەندەي كوپشىلىككە كۇلىپ قويادى.
بۇل جەردە كولىك جۇرگىزۋشىسىنىڭ ەش كىناسى جوق. ول امالسىزدان سول ارەكەتكە باردى. ويتكەنى قالادا قوعامدىق دارەتحانا جوق. بۇل كۇندەرى جول جاعاسىنداعى كافە، دۇكەن دەگەندەرىڭ دارەتحاناعا كىرۋگە رۇقسات بەرمەيدى. ولاردىڭ دا ەسەبى دۇرىس. ويتكەنى سىرتتان كەلگەن ادامداردىڭ بارلىعىنا رۇقسات برە بەرسە كەشكە دەيىن قانشاما شىعىن كەلەدى.
بىر-ەكى جىل بۇرىن الماتىدا حالىق كوپ جينالاتىن جەرلەردە (ساياباقتاردا، بازار ماڭىندا، ت.ب.) ورنالاسقان قوعامدىق دارەتحانالار پايدا بولدى. بۇقارالىق اقپارات قۇرالدارى ناقتى مەكەنجايلاردى جاريالاپ، ينستاللياسيانىڭ باستاماشىلارى Visit Almaty جىگىتتەرى ەكەنىن جازعان.
ءتىپتى 20 اجەتحانانىڭ سمەتالىق قۇنى دا جاريالاندى – 178،5 ميلليون تەڭگە (1 دارەتحاناعا شامامەن 6،5 ميلليون تەڭگە). بۇقارالىق اقپارات قۇرالدارى دارەتحانالاردا جىلۋ بولاتىنىن، سۋدى جىلىتۋعا ارنالعان قازاندىقتار، ۆانداليزمگە قارسى ۋنيتازدار، راكوۆينالار، قول كەپتىرگىشتەر، سابىن سالعىش جانە ت.ب. ورناتىلادى دەپ بولجادى.
جاعدايدى سول كەزدە قالالىق تۋريزم باسقارماسى باسشىسىنىڭ ورىنباسارى مارلەن مارالوۆ:
- مۇنداي دارەتحانالارعا سۇرانىس بار. قالا تۇرعىندارى مەن قوناقتارىنىڭ ۇسىنىسى بولعان. دارەتحانانىڭ باعاسى كومپانيالاردىڭ كوممەرسيالىق ۇسىنىستارى نەگىزىندە جاسالدى. بۇل سوماعا دارەتحانا ءمودۋلىن جاساۋ، قۇراستىرۋ، جەتكىزۋ قۇنى مەن سانتەحنيكالىق قۇرالدارىنىڭ باعاسى كىرەدى. دارەتحانالاردا جەلدەتكىش، جىلىتۋ، سىرتقى باقىلاۋ كامەرالارى ورناتىلعان. سونداي-اق مۇمكىندىگى شەكتەۋلى جاندار ءۇشىن دە ءتيىستى تالاپتار ەسكەرىلگەن، - دەگەن بولاتىن.
شىنىمەن قۇنى شامامەن 6،5 ميلليون تەڭگە تۇراتىن دارەتحانالار ىستەپ تۇر ما؟ بۇعان ارنايى كوز جەتكىزىپ قايتتىق.
سايران كولىنىڭ ماڭىنداعى دارەتحانا ەسىگىن اشا الماعان ايەلدەر اۆتوۆوكزالعا بەت تۇزەدى. ال اۋەزوۆ اتىنداعى اكادەميالىق دراما تەاترىنىڭ جانىنداعى دارەتحانانىڭ ءۇش ەسىگىنىڭ بىرەۋى عانا اشىق. ءبىراق، ىشىنەن جىلى سۋ نەمەسە جەلدەتكىش تابا المادىق. قىستىڭ كۇنى تابيعي جەلدەنىپ تۇرعان تەرەزەنى جاپساڭىز ىشىندە تۇنشىعىپ قالۋ ءقاۋپى بار ەكەنىن دە ايتا كەتكەن ءجون بولار. ال بايتۇرسىنوۆ ساياباعىنداعى قوعامدىق دارەتحانانىڭ ەسىگىن قانشا اشامىز دەگەنىمىزدەن تۇك شىقپادى.
نەلىكتەن وسى اجەتحانالارعا قىزمەت كورسەتەتىن ادامداردى جۇمىسقا الىپ، بيۋدجەتتە الدىن الا قاراجات تولەۋ قاراستىرىلماعان؟ (ولار تازالىقتى، دارەتحانانىڭ جۇمىسقا جارامدىلىعىن باقىلاپ وتىرۋى كەرەك).
الماتىدا تۋريستىك ماۋسىم باستالدى. ال، سانيتارلىق توراپ دەپ اتالاتىن بۇل نىسان قالا تۇرعىندارى مەن قوناقتارىنا ەسىگىن جاۋىپ الىپ اشار ەمەس...