بۇگىن، 15 ماۋسىمدا شقو اكىمى دانيال احمەتوۆتىڭ وكىلەتتىگى اياقتالادى.
وبلىستىق ءماسليحاتتىڭ باسپا ءسوز قىزمەتىنىڭ حابارلاۋىنشا، ەرتەڭ دەپۋتاتتاردىڭ جينالىسى بولادى. وندا جاڭا اكىمدى تاعايىنداۋعا كەلىسىم بەرۋ ءراسىمى وتەدى.
شىعىس قازاقستان وبلىسى ەلىمىز ءۇشىن ستراتەگيالىق ماڭىزدى ايماق. سولتۇستىگى رەسەي، شىعىسى جۇڭگو مەملەكەتتەرىمەن شەكارالاس. سوندىقتان وڭىرگە ەلدىڭ الەۋمەتتىك-ەكونوميكالىق جاعدايىنان حابارى بار، شارۋاشىلىق جانە ديپلوماتيالىق قابىلەتى كۇشتى باسشى كەرەك.
ايماقتا قوردالانعان تۇيتكىلدەر كوپ. بىلتىر ريددەردەگى جەس-دا بولعان اپات ايماقتىڭ ەنەرگەتيكا سالاسى اقساپ تۇرعانىن كورسەتتى. ودان بولەك ەكولوگيالىق اپات، جولداردىڭ جاعدايى سياقتى ماسەلەلەر دە بار. اسىرەسە، اباي وبلىسىندا بولعان ءورتتىڭ بۇكىل ءوڭىر ەكولوگياسىنا قالاي اسەر ەتەتىنى تۋرالى ەشكىم ءدوپ باسىپ ايتا المايدى. وسى جانە وزگە دە تۇيتكىلدەردىڭ ءالى كۇنگە دەيىن شەشىمىن تاپپاعانىن ەسكەرسەك، قازىرگى وبلىس اكىمى دانيال احمەتوۆتىڭ ءوز ورنىن ساقتاپ قالۋى ەكىتالاي.
وبلىستى 9 جىل باسقارعان دانيال احمەتوۆتىڭ قازىرگى جاعدايى اۋىر. ساياسي سالماعى تومەندەگەن. اكىمدەردىڭ جۇمىسىن زەرتتەيتىن «ستراتەگيا» الەۋمەتتىك-ساياسي زەرتتەۋ قورىنىڭ سوڭعى رەيتينگىندە دانيال احمەتوۆ اكىمدەر اراسىندا ەكى جىل قاتارىنان كوش سوڭىندا قالىپ قويدى.
ءبىراق ازىرگە ايماققا كىم باسشى بولاتىنى تۋرالى رەسمي اقپارات جوق. ءبىزدىڭ بولجامىمىز بويىنشا، ەرمەك كوشەربايەۆ، دارحان قالەتايەۆ نەمەسە التاي كۇلگىنوۆ ايماق تىزگىنىن ۇستاۋى مۇمكىن.
التاي كۇلگىنوۆتى بۇل تىزىمنەن الىپ تاستاۋعا دا بولادى. سەبەبى ول ۆيسە-پرەمەرلىك قىزمەتتەن قوعامدا بولعان داۋ تۇسىندا كەتتى. ساراپشىلار ونىڭ قىزمەتتەن كەتۋىن استانادا ورىن العان سۋ تاپشىلىعىمەن بايلانىستىرادى. مامانداردىڭ پىكىرى بويىنشا سۋ تاپشىلىعىن ول استانادا اكىم بولعان كەزدە شەشە الماعان. ال ونىڭ سۋ ماسەلەسى ءورشىپ تۇرعان ايماققا اكىم بولۋى وتقا ماي قۇيعانمەن بىردەي.
كەلەسى ۇمىتكەر قازاقستاننىڭ ۋكرايناداعى ەلشىسى دارحان قالەتايەۆ. دارحان مىرزانىڭ وسى ايماقتىڭ تىزگىنىن ۇستاۋى مۇمكىن دەگەن سىبىس بىلتىر دا بولدى. ءبىراق ءقازىر قازاقستان ءۇشىن ۋكراينا باعىتىندا اتقاراتىن جۇمىس جەتكىلىكتى. سوندىقتان بۇل ۇمىتكەر دە باسشىلىققا كەلمەيدى دەپ بولجاپ وتىرمىز.
قولدانىستاعى زاڭناماعا سايكەس، مەملەكەت باسشىسى دەپۋتاتتارعا ەكى ۇمىتكەردى ۇسىنادى. ال قاسىم-جومارت توقايەۆتىڭ بارلىق كادرلىق تاعايىنداۋلارىن ساراپتايتىن بولساق، ديپلوماتيالىق قىزمەتتە تاجىريبەسى بار ازاماتتارعا سەنىم ارتقانىن كورەمىز. وسى تۇرعىدان قارايتىن بولساق، ايماققا ەرمەك كوشەربايەۆ اكىم بولۋى مۇمكىن.
سەبەبى ول 1988 جىلدان بەرى سىرتقى ىستەر مينيسترلىگى قۇرىلىمىندا جۇمىس ىستەپ كەلەدى. ايماقتا جۇمىس ىستەۋ تاجىريبەسى دە بار. 2010-2014 جىلدارى شقو اكىمىنىڭ ورىنباسارى قىزمەتىن اتقارعان. وندا ول يندۋستريالاندىرۋ ماسەلەلەرىمەن اينالىستى. سوندىقتان ەنەرگەتيكا، ءىرى ونەركاسىپ تاقىرىپتارىمەن تانىس.
سونىمەن قاتار، 2022 جىلى وبلىستا رەسەيلىك كاپيتالى بار كومپانيالار سانى 17%-عا ءوستى. بۇل الەمدەگى گەوساياسي جاعداي ناشارلاعان ۋاقىتتا ماڭىزدى ماسەلەگە اينالىپ وتىر. سوندىقتان جاڭا باسشىعا وسى باعىتتا دا جۇمىس ىستەۋىنە تۋرا كەلەدى.