بۇل ەۋرووداقتا وسىنداي قادامعا بارعان العاشقى ەل.
دانيا كوروناۆيرۋسقا قاتىستى بارلىق شەكتەۋدى الىپ تاستادى. بۇل ەۋرووداقتا وسىنداي قادامعا بارعان العاشقى ەل. جەرگىلىكتى اقپارات قۇرالدارى مۇندا تۇرعىنداردىڭ بەتپەردەسىز جۇرگەنىن تاراتتى، دەپ حابارلايدى Almaty-akshamy.kz 24.kz-كە سىلتەمە جاساپ.
1 قىركۇيەكتەن بەرى قوعامدىق ورىنداردا ۆاكسينالاۋ ءتولقۇجاتى دا تالاپ ەتىلمەيدى. ونى تەك تۇنگى كلۋبقا كىرگەندە سۇرايتىن ەدى. ەندى ول دا جوق. بۇگىن ەلدە ەۋروپاداعى ەڭ اۋقىمدى كونسەرت ءوتۋى ءتيىس. وعان 50 مىڭداي ادام قاتىسادى. بيلىكتىڭ مۇنداي قادامعا بارۋىنا يممۋنداۋدىڭ جوعارى كورسەتكىشى تۇرتكى بولعان. بۇگىندە دانيادا جاسى 12-دەن اسقان تۇرعىنداردىڭ 83 پروسەنتى ەكپەنىڭ قاجەتتى ەكى دوزاسىن دا الىپ ۇلگىرگەن. دەگەنمەن، سىرتتان كەلۋشىلەر ۆاكسينا سالدىرعانىن راستايتىن قۇجات نە پتر-تەستتىڭ تەرىس ناتيجەسىن كورسەتۋگە مىندەتتى. مۇندا تەك اۋەجايدا عانا بەتپەردەسىز جۇرۋگە رۇقسات جوق.