حالىقتىڭ ءومىر ءسۇرۋ ساپاسى باستى نازاردا
شىعىس قازاقستان وبلىسىندا شەكارا ماڭىنداعى اۋماقتار مەن بۇرىنعى اۋدان ورتالىقتارىن دامىتۋ جۇمىستارى ءجۇرىپ جاتىر. بۇل تۋرالى شىعىس قازاقستان وبلىسىنىڭ اكىمى دانيال احمەتوۆ ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«اۋماقتاردى دامىتۋ تاقىرىبىن جالعاستىرا وتىرىپ، وبلىستاعى ماڭىزدى باعىت – شەكارا ماڭىنداعى اۋداندار مەن بۇرىنعى اۋدان ورتالىقتارىن قايتا جاڭعىرتۋدى ايتپاي كەتۋگە بولمايدى. جۇڭگو حالىق رەسپۋبليكاسىمەن شەكارالاس ورنالاسقان، وبلىس ورتالىعىنان شامامەن 400 شاقىرىم قاشىقتىقتا ورنالاسقان وڭىرلەر ءۇشىن حالىقتىڭ ءومىر ءسۇرۋ ساپاسىن جاقسارتۋعا باعىتتالعان كەشەندى جوسپارلار قابىلداندى»، - دەدى د. احمەتوۆ ورتالىق كوممۋنيكاسيالار قىزمەتىندە.
ونىڭ ايتۋىنشا، ورتالىق جانە شەت اۋماقتار اراسىنداعى احۋالدى تەڭەستىرۋگە 2020 جىلدان 2024 جىلعا دەيىن بەس جىلدا 183 ملرد تەڭگە باعىتتاۋ جوسپارلانعان، ونىڭ ىشىندە 2021 جىلى 43 ملرد تەڭگە جۇمسالدى. بيىل وبلىستاردىڭ ءبولىنۋىن ەسكەرە وتىرىپ، 44 ملرد تەڭگەگە ءىس-شارالار ىسكە اسىرىلادى. بۇرىنعى اۋدان ورتالىقتارىن دامىتۋ باعدارلاماسى بويىنشا 2021-2024 جىلدارى الەۋمەتتىك-ەكونوميكالىق جاعدايدىڭ ساپالى وزگەرۋىنە 43 ملرد تەڭگە قاراستىرىلعان. ونىڭ ىشىندە 2021 جىلى جوبالاردى ىسكە اسىرۋعا 14 ملرد تەڭگە جۇمسالدى، بيىلعى جىلعا 8 ملرد تەڭگە ءبولىندى.
«شەكارا ماڭىنداعى اۋماقتار مەن بۇرىنعى اۋدان ورتالىقتارىن دامىتۋ جوسپارلارىن ىسكە اسىرۋدىڭ ەكى جىلدىق ناتيجەسىندە 15 مىڭنان استام جاڭا جۇمىس ورنى اشىلدى، 9 سپورت نىسانى، كوپ پاتەرلى 3 جانە ەكى پاتەرلى 202 (19 مىڭ شارشى مەتر) ءۇي سالىندى، 283 كيلومەتر سۋمەن قامتۋ جۇيەسى تارتىلدى، 156 الەۋمەتتىك نىسان، سونداي-اق 450 كيلومەتردەن استام جولدار مەن كوشەلەر جوندەلدى»، - دەپ باياندادى دانيال احمەتوۆ.