الماتىدا «دامۋ بالا» باعدارلاماسى بويىنشا وقيتىن بالالار ءۇشىن Face ID جۇيەسى بيىلدىڭ سوڭىنا دەيىن ەنگىزىلەدى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە الماتى اكىمى ەربولات دوسايەۆ مالىمدەدى، دەپ حابارلايدى aqshamnews.kz
قالا باسشىسى الماتى قالاسىنىڭ قوعامدىق كەڭەسىمەن بىرلەسىپ، سەكسيالار مەن ۇيىرمەلەردى تەكسەرۋ جۇرگىزىلگەنىن جانە «دامۋ بالا» باعدارلاماسى بويىنشا قىزمەت كورسەتۋدە ادال ەمەس جەتكىزۋشىلەر انىقتالعانىن اتاپ ءوتتى.
«ادال ەمەس جەتكىزۋشىلەر بالالارىمىزدى، اتا-انالاردى الداپ وتىر، ال كەيبىر اتا-انالار مۇنداي جاعدايلارعا كەلىسىپ جاتقانىن كورىپ وتىرمىز. قوعامدىق كەڭەسپەن بىرگە ۇلكەن جۇمىس اتقارىلدى. ولار كوپتەگەن ورىنداردى ارالاپ، شىعارماشىلىق ۇيىرمەلەر بولسىن، سپورتتىق سەكسيالار بولسىن، مۇنداي قىزمەتتەردىڭ قانداي جاعدايلاردا كورسەتىلەتىنىن قاراپ شىقتى»، – دەدى ەربولات دوسايەۆ جۋرناليستەردىڭ سۇراعىنا جاۋاپ بەرە وتىرىپ.
اكىمنىڭ ايتۋىنشا، بيىلدىڭ سوڭىنا دەيىن سەكسيالار مەن ۇيىرمەلەرگە قاتىسۋدى باقىلاۋدى كۇشەيتۋ ماقساتىندا Face ID جۇيەسىنە تولىقتاي كوشۋ اياقتالادى.
باعدارلامانى قارجىلاندىرۋعا كەلەتىن بولساق، 2025 جىلى بيۋدجەت بيىلعى دەڭگەيدە ساقتالادى. قازىرگى ۋاقىتتا قاراجات قالانىڭ 8 اۋدانىنا بولىنگەن. سونىمەن قاتار، قازىرگى ۋاقىتتا بالالار كونتينگەنتىنىڭ ازايۋى بايقالۋدا. بۇل ءوز كەزەگىندە 2025 جىلى كەزەكتە تۇرعان بالالاردىڭ باعدارلاماعا قاتىسۋىنا مۇمكىندىك بەرەدى.
«ءبىز جاڭا ەرەجەلەر قابىلدادىق، وعان سايكەس ۆاۋچەرلەر مەرزىمسىز بولمايدى. ءبىر وتباسى بىرنەشە جىل بويى ونى پايدالانا بەرمەۋى ءۇشىن كەزەك ۇنەمى جاڭارتىلىپ وتىرادى»، – دەپ قوستى اكىم.
سونداي-اق، ەربولات دوسايەۆ ادال جەتكىزۋشىلەردەن جاقسى پىكىرلەر ءتۇسىپ جاتقانىن ايتتى.
«ادال ەمەس جەتكىزۋشىلەرمەن كەلىسىمشارتتاردى توقتاتىپ جاتىرمىز. ولار مەملەكەتتىك ساتىپ الۋ قاتىسۋشىسى بولۋى كەرەك بولعاندىقتان، ولاردى ادال ەمەس جەتكىزۋشىلەر تىزىمىنە ەنگىزۋ قيىن. ءقازىر وسى ماسەلەنى شەشىپ جاتىرمىز، بولاشاقتا مۇنداي جەتكىزۋشىلەردى باعدارلاماعا قاتىستىرماۋعا مۇمكىندىك بولادى»، – دەدى ەربولات دوسايەۆ.