اقمولا وبلىسىنىڭ بۋراباي اۋدانىندا 40-قا جۋىق ءورت ءسوندىرۋشى جازعى ءدامحانادا ورىن العان ءورتتى ءسوندىردى، دەپ حابارلايدى Almaty-akshamy.kz ءوڭىردىڭ توتەنشە جاعدايلار دەپارتامەنتىنە سىلتەمە جاساپ.
بۋراباي اۋدانى، بۋراباي اۋىلىنداعى جازعى ءدامحانادا ءورت شىققانى تۋرالى حابارلاما 5 شىلدەدە ساعات 03.09-دا تۇسكەن.
شاقىرتۋ ورنىنا بىردەن توتەنشە جاعدايلار دەپارتامەنتىنىڭ جەكە قۇرامىنىڭ 38 ادامى مەن 10 تەحنيكاسى، «بۋراباي» مەملەكەتتىك ۇلتتىق تابيعي پاركىنىڭ 2 قىزمەتكەرى مەن 2 تەحنيكاسى جونەلتىلدى.
قابىلدانعان جەدەل ءىس-شارالاردىڭ ارقاسىندا ساعات 04.13 وقشاۋلانعان ءورت، 05.04-تە جويىلدى.
جاراقات العاندار مەن زارداپ شەككەندەر جوق.
ءورتتىڭ شىعۋ سەبەبى انىقتالىپ جاتىر.
«كەلگەن ۋاقىتتا جازعى ءدامحانانىڭ عيماراتى تولىعىمەن ورتكە ورانعانى انىقتالدى. بۇل، حابارلامانىڭ كەش تۇسكەنىن كورسەتەدى. لەزدە قوسىمشا كۇشتەر مەن قۇرالداردى تارتۋ تۋرالى شەشىم قابىلداندى. ءسوندىرۋ كەزىندە 4 گاز باللونى جارىلىپ، بۇل جالىننىڭ كورشىلەس عيماراتتارعا ودان ءارى تەز تارالۋىنا اسەر ەتتى.
جەدەل قابىلدانعان شارالار وتتىڭ تۇرعىن ۇيلەرگە تارالۋىنىڭ الدىن الدى»، - دەدى ششۋچە قالالىق جاساعىنىڭ باستىعى رۋسلان بازاربايەۆ.
اقمولا وبلىسىنىڭ توتەنشە جاعدايلار دەپارتامەنتى وبلىس قوناقتارى مەن تۇرعىندارىنا ءورت قاۋىپسىزدىگى ەرەجەلەرىن ساقتاۋ قاجەتتىگىن ەسكە سالدى. ءورت بولعان جاعدايدا دەرەۋ «101» جانە «112» تەلەفوندارىنا حابارلاسۋ قاجەت.