قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترىندا «DALA DAUYSY» رەسپۋبليكالىق كونكۋرسىنىڭ جەڭىمپازدارى مەن لاۋرەاتتارىن ماراپاتتاۋ ءراسىمى جانە گالا-كونسەرت ءوتتى، دەپ حابارلايدى aqshamnews.kz
كونكۋرس ماقساتى - ۇلتتىق مادەنيەتتى ساقتاۋ جانە دامىتۋ، قوعامداعى رۋحاني قۇندىلىقتاردى نىعايتۋ، سونداي-اق وسكەلەڭ ۇرپاقتى ادامگەرشىلىك پەن پاتريوتتىققا تاربيەلەۋ باعىتىندا ءداستۇرلى، كلاسسيكالىق، ەسترادا جانە تەاتر ونەرى جانرىندا جاڭا تۋىندىلاردىڭ اۆتورلارىن قولداۋ.
كونكۋرسقا 5 نوميناسيا بويىنشا 15 سىيلىق جانە ق ر مادەنيەت جانە اقپارات مينيسترلىگىنىڭ 2 ارنايى جۇلدەسى تاعايىندالدى.
بيىل كونكۋرسقا قاتىسۋ ءۇشىن 1 ءساۋىر مەن 1 قاراشا كۇندەرى ارالىعىندا 154 ءوتىنىم كەلىپ ءتۇستى. كونكۋرسقا سوڭعى ەكى جىلدا جازىلىپ، كوپشىلىك الدىندا جاريالانباعان قازاقستاندىق كومپوزيتورلار مەن جازۋشىلاردىڭ شىعارمالارى قابىلداندى. جەڭىمپازدار مەن لاۋرەاتتاردى قازاقستاننىڭ بەلگىلى مادەنيەت جانە ونەر قايراتكەرلەرىنەن ارنايى قۇرىلعان قازىلار القاسى جابىق تۇردە انىقتادى.