1 قاڭتاردان باستاپ قازاقستاندىقتار ساۋساق ىزدەرىن تاپسىرۋعا مىندەتتەلەدى
كەلەسى جىلى 1 قاڭتاردان باستاپ قازاقستاندىقتار مىندەتتى داكتيلوسكوپيالىق تىركەۋدەن وتەدى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
بۇل تۋرالى ىشكى ىستەر مينيسترلىگىندە وتكەن اپتالىق باسپا ءسوز ءماسليحاتىندا ءىىم كوشى-قون قىزمەتى كوميتەتىنىڭ اعا ينسپەكتورى نۇرجان جاڭابايەۆ مالىمدەدى.
ايتۋىنشا، پاسپورت پەن جەكە كۋالىكتى العان كەزدە ازاماتتاردى مىندەتتى داكتيلوسكوپيالىق تىركەۋ ەنگىزىلەدى.
داكتيلوسكوپيالىق تىركەۋ - بۇل ساۋساقتاردىڭ پاپيلليارلىق ۇلگىلەرىنىڭ قۇرىلىمدىق ەرەكشەلىكتەرى تۋرالى اقپارات الۋ. ونىڭ ماقساتى - ادامنىڭ مۇددەلەرىن قورعاۋ، ونىڭ زاڭدى قۇقىقتارىن، دەنساۋلىعى مەن قاۋىپسىزدىگىن قامتاماسىز ەتۋ. بىرىنشىدەن، بۇل ءىس-شارالار جەكە تۇلعالاردى بيومەتريالىق سايكەستەندىرۋدى جەتىلدىرۋگە باعىتتالعان، بۇل ءوز كەزەگىندە زاڭسىز قۇجاتتاندىرۋ فاكتىلەرىن بولدىرماۋعا، قۇجاتتاردى قولدان جاساۋدان، ولاردىڭ يەلەرىن الاياقتىق جانە وزگە دە قىلمىستىق ارەكەتتەردەن قورعاۋعا مۇمكىندىك بەرەدى.، - دەپ ءتۇسىندىردى اعا ينسپەكتور.
بەلگىلى بولعانداي، داكتيلوسكوپيالىق تىركەۋ ءبىزدىڭ ازاماتتارىمىزدىڭ باسقا ەلدەردىڭ مەملەكەتتىك شەكارالارىن كەسىپ ءوتۋ ءراسىمىن جەڭىلدەتۋدى كوزدەيدى.
بۇل كۇندەلىكتى ومىردە دە، جازاتايىم وقيعالاردا دا، سونىڭ ىشىندە تەحنوگەندىك جانە تابيعي سيپاتتاعى جەكە باسىن كۋالاندىراتىن قۇجاتتاردى قالپىنا كەلتىرۋ ءراسىمىن جەڭىلدەتىپ قانا قويمايدى، سونىمەن قاتار جەدەلدەتەدى. بولاشاقتا داكتيلوسكوپيالىق اقپاراتتىڭ ارقاسىندا زاماناۋي سمارتفوندار ارقىلى مەملەكەتتىك قىزمەتتەردى قاشىقتىقتان الۋدى ودان ءارى دامىتۋ مۇمكىندىگى پايدا بولادى، - دەدى نۇرجان جاڭابايەۆ.
داكتيلوسكوپيالىق تىركەۋ تۋرالى نەنى بىلگەن ءجون:
• 12 جاسقا دەيىنگى بالالاردان باسقا، قازاقستان رەسپۋبليكاسىنىڭ بارلىق ازاماتتارى جانە قازاقستان رەسپۋبليكاسىندا تۇراقتى تۇراتىن شەتەلدىكتەر داكتيلوسكوپيالىق تىركەۋگە جاتادى؛
• 12 جاستان 16 جاسقا دەيىنگى بالالار ەرىكتى نەگىزدە داكتيلوسكوپيالىق تىركەۋگە جاتادى؛
• ساۋساق ىزدەرىن الۋ حقكو-لاردا جەكە كۋالىكتەردى، پاسپورتتاردى، شەتەلدىكتىڭ تۇرۋعا ىقتيارحاتتارىن جانە ازاماتتىعى جوق ادامنىڭ كۋالىكتەرىن رەسىمدەۋ كەزىندە جۇرگىزىلەتىن بولادى.