الماتى حالىقارالىق اۋەجايى اۋماعىندا تەرروريزمگە قارسى جوسپارلى وقۋ-جاتتىعۋ وتكىزىلدى. الماتى قالالىق جەدەل شتابى ۇيىمداستىرعان شارا اياسىندا تەررورلىق ءقاۋىپتىڭ «قىزىل دەڭگەيى» جاريالانىپ، ارنايى جاساق ساربازدارى «سودىرلاردى» ۇستاپ، «تۇتقىنداردى» بوساتتى.
جاتتىعۋدىڭ باستى ماقساتى – ادامدار كوپ جينالاتىن نىسانداردا بولۋى مۇمكىن تەررورلىق ارەكەتتەردىڭ الدىن الۋ، سونداي-اق توتەنشە جاعداي كەزىندە ارەكەت ەتۋ تەتىكتەرىن جەتىلدىرۋ. شاراعا ارنايى جانە قۇقىق قورعاۋ ورگاندارىنىڭ قىزمەتكەرلەرى، اۆياسيالىق قاۋىپسىزدىك قىزمەتى، اۋەجاي اكىمشىلىگى مەن قالانىڭ شۇعىل ارەكەت ەتۋ بولىمشەلەرى قاتىستى.
ۇيىمداستىرۋشىلار وقۋ-جاتتىعۋ بارىسىندا اۋە رەيستەرى مەن اۆتوكولىك قوزعالىسىنا شەكتەۋ قويىلماعانىن ايتتى. بارلىق شارا شتاتتىق رەجيمدە ءوتتى. حابارلاما جۇيەسىنىڭ قىزمەتى، جەدەل ارەكەت ەتۋ شارالارى تەكسەرىلدى. مەملەكەتتىك ورگانداردىڭ وقيعانىڭ الدىن الۋ، سالدارىمەن كۇرەسۋ جانە جويۋ كەزىندە بىرىگىپ ارەكەت ەتۋىنە ءمان بەرىلدى.
مۇنداي وقۋ-جاتتىعۋلاردىڭ نەگىزگى مىندەتى – توتەنشە جاعداي كەزىندە ءار قىزمەتتىڭ ءىس-قيمىلىن ناقتى ۇيلەستىرۋ جانە شىنايى ءقاۋىپ تونگەن جاعدايدا ادام ءومىرىن قورعاۋ. اسىرەسە، ادامداردى ەۆاكۋاسيالاۋ، قىلمىسكەرلەردى ۇستاۋ جانە تەرروريستىك قاتەردىڭ سالدارىن جويۋ بويىنشا ارەكەتتەر پىسىقتالدى.
ساعات 8.00
وقۋ-جاتتىعۋ سەنارييىنە سايكەس، الماتى حالىقارالىق اۋەجايى اۋماعىندا دابىل داۋىسى ەستىلدى. بۇل دىبىس – شارتتى تۇردە توتەنشە جاعدايدىڭ باستالعانىن بىلدىرەدى. سەناريي بويىنشا «جولاۋشىلار ۇشاعىن تەرروريستەر باسىپ الىپ، اۋە كولىگىندەگى ادامداردى كەپىلدىككە ۇستادى». وسى ساتتە اۋەجاي قىزمەتكەرلەرى ارنايى تەحنيكامەن اۋە كەمەسىن قورشاپ، ونىڭ ۇشۋىنا توسقاۋىل قويدى. ودان كەيىن اۋەجايدىڭ قاۋىپسىزدىك قىزمەتى «كەلىپ، ۇشاقتى» تولىقتاي قورشاۋعا الدى.
ساعات 08:15
لاڭكەستىك ارەكەتكە قارسى كۇرەس بويىنشا الماتى قالالىق جەدەل شتابى قۇرىلدى. مۇندا ارنايى قىزمەتتەردىڭ باسشىلىعى جينالىپ، جاعدايدى باقىلاۋعا الىپ، جەدەل شەشىم قابىلداۋعا كىرىستى.
ساعات 08:30
قالانىڭ توتەنشە جاعداي كەزىندەگى قىزمەتتەرى – ءورت سوندىرۋشىلەر، مەديسينا جانە پوليسيا قىزمەتكەرلەرى وقيعا ورنىنا جەتتى. ارنايى جاساق ساربازدارى ۇشۋ-قونۋ جولاعىن قورشاۋعا الدى. سول ۋاقىتتا كەلىسسوز جۇرگىزۋشىلەر «تەرروريستەرمەن» بايلانىس ورناتۋعا كىرىستى. لاڭكەستەر كەلىسسوزگە تەك قالا اكىمىنىڭ ورىنباسارى نەمەسە اكىمنىڭ ءوزىن شىعارۋدى تالاپ ەتتى. كەلىسسوز جۇرگىزۋشى تاراپ سابىرلى ءارى كاسىبي تۇردە ارەكەت ەتىپ، ەشكىمگە زيان كەلتىرمەي، ماسەلەنى بەيبىت جولمەن شەشۋدى ۇسىندى.
ساعات 09:00
«تەرروريستەر» كەلىسسوز جۇرگىزۋشىلەردىڭ ءبىرىن ۇشاققا كىرگىزىپ، شامامەن ءبىر ساعات بويى «كەپىلدە ۇستادى». كەيىن ونى بوساتىپ، ورنىنا باسقا ادامدى تالاپ ەتتى.
ساعات 09:30
اۋەجاي اۋماعىنا اسكەري قىزمەتكەرلەر كەلىپ، وقۋ-جاتتىعۋ ايماعىن تولىق قورشاۋعا الدى. عيماراتتىڭ توبەسىنە سنايپەرلەر ورنالاستىرىلىپ، جاعدايدى جوعارىدان باقىلاۋعا الدى.
ساعات 09:45
«تەرروريستەر» مەن بەيبىت كەلىسىمگە كەلۋگە تىرىسقان تاراپ اراسىنداعى اڭگىمە كۇردەلەنە ءتۇستى. تەرروريستەر ۇشاق ىشىندەگى بىرنەشە جولاۋشىنى «جارالاپ»، دارىگەردى شاقىرۋدى تالاپ ەتتى. مەديسينا قىزمەتكەرى ۇشاققا كىرىپ، «جارالانعاندارعا» كومەك كورسەتىپ، بىرنەشە مينۋتتان كەيىن قايتا شىقتى.
ساعات 10:00
«ۇشاقتى باسىپ العان لاڭكەستەر» دورەكى مىنەز كورسەتىپ، ودان سايىن اگرەسسيۆتى بولا ءتۇستى. ولار ەكى زەينەتكەردى بوساتتى. ارنايى جاساق ساربازدارى ولاردى قارسى الدى. كەپىلدىكتەن بوساعان ءاربىر تۇتقىندى ارنايى جاساق ساربازدارى مۇقيات تەكسەردى. ويتكەنى، تەرروريستەر ولاردىڭ دەنەسىنە «جارىلعىش زات» بەكىتۋى مۇمكىن ەدى. ساربازدار بەيبىت تۇرعىنداردىڭ ارتىنان قالقان بولىپ، ولاردىڭ قاۋىپسىزدىگىن قامتاماسىز ەتتى.
ساعات 11:00
«تەرروريستەرمەن» كەلىسسوز ناتيجەسىز اياقتالدى. ولار ءوز تالاپتارىنىڭ ورىندالماعانىنا اشۋلانىپ، ەكى جولاۋشىنى وزگەلەردىڭ كوزىنشە «ءولتىردى»، قالعاندارىنا «پسيحولوگيالىق قىسىم كورسەتتى». بۇل ءسات – وقۋ-جاتتىعۋ بارىسىنداعى شەشۋشى كەزەڭ. شتابتاعى ارنايى قىزمەت باسشىلىعى احۋالدى جان-جاقتى باعالادى. «تەرروريستەردىڭ» ارەكەتى ازاماتتاردىڭ ومىرىنە «ءقاۋىپ توندىرگەندىكتەن»، ۇشاقتى شابۋىل ارقىلى بوساتۋ جونىندە شەشىم قابىلداندى. ارنايى جاساق ساربازدارى مەن سنايپەرلەر جەدەل تۇردە «ۇرىس پوزيسيالارىن» ناقتىلاپ، وپەراسيا جوسپارى بەكىتىلدى.
بۇيرىق بەرىلگەن ساتتەن باستاپ، ءار سارباز ءوز مىندەتىن ايقىن ءتۇسىنىپ، ازاماتتاردى امان الىپ قالۋعا باعىتتالعان ناقتى قيمىل جوسپارىنا كوشتى.
ساعات 12:10
وقۋ-جاتتىعۋدىڭ شەشۋشى كەزەڭى باستالدى.
شتاب باسشىسى ۇشاقتى شۇعىل تۇردە بوساتىپ، «تەرروريستەردى» زالالسىزداندىرۋ تۋرالى بۇيرىق بەردى. وسى ساتتەن باستاپ «ارنايى وپەراسيانىڭ» نەگىزگى بولىگى باستالدى.
ۇشاقتىڭ سول جاعىنان ەكى اسكەري بتر كولىگى جوعارى جىلدامدىقپەن كەلىپ، جارىق-شۋلى گراناتالار قولداندى. سول ۋاقىتتا ارنايى جاساق ساربازدارى ۇشاقتىڭ الدىڭعى جانە ارتقى ەسىكتەرى ارقىلى ءبىر مەزەتتە ىشكە ەندى.
ساربازدار ۇشاقتىڭ ەسىك، تەرەزە جانە قانات تۇستارىن قورشاي وتىرىپ، شابۋىلعا كىرىستى. بىرنەشە سەكۋند ىشىندە «لاڭكەستەرگە» قارسى شەشۋشى ارەكەت جاسالىپ، ۇشاق تولىقتاي «تەرروريستەردەن» تازارتىلدى. «جولاۋشىلار» ءقاۋىپسىز جەرگە ەۆاكۋاسيالاندى. مەديسينالىق توپ «تۇتقىنداردىڭ» جاعدايىن تەكسەرىپ، العاشقى كومەك كورسەتتى. وپەراسيا اياقتالعان سوڭ پوليسيا قىزمەتكەرلەرى «تەرروريستەردى» ارنايى كولىكپەن الىپ كەتتى.
وقۋ جاتتىعۋ اياسىندا ارنايى جانە قۇقىق قورعاۋ ورعاندارىنىڭ سىن ساعاتىندا جەدەل ارەكەت ەتىپ، سودىرلاردى ۇستاۋى ءىس جۇزىندە كورەتىلدى. سونداي-اق، اۋەجاي سەكىلدى ادام كوپ شوعىرلاناتىن ورىنداردا بولۋى مۇمكىن تەررورلىق اكتىلەردىڭ سەنارييى پىسىقتالدى. وقۋ جاتتىعۋ شاراسى قاتىسۋشىلاردىڭ وقيعا سالدارىمەن كۇرەسۋگە جانە ونىڭ الدىن الۋعا قاۋقارلى ەكەنىن كورسەتتى.
سالتانات ازىربەك، الماتى قالاسى ءپد-نىڭ رەسمي وكىلى: وقۋ-جاتتىقۋ تاپسىرمالارى تولىق ورىندالدى
ءىس-شارا اياسىندا قالامىزداعى جەدەل ارەكەت ەتۋ قىزمەتتەرى مەن لاڭكەستىككە قارسى باعىتتا جۇمىس ىستەيتىن بارلىق قۇقىق قورعاۋ ورگاندارىنىڭ ءىس-قيمىلدارى تولىق كولەمدە تەكسەرىلدى. جاتتىعۋ بارىسىندا تەرروريزم اكتىلەرىنىڭ الدىن الۋ، ىقتيمال قاۋىپتەردىڭ سالدارىن جويۋ جانە ازاماتتاردىڭ قاۋىپسىزدىگىن قامتاماسىز ەتۋ بويىنشا بىرلەسكەن ىس-ارەكەتتەر پىسىقتالدى. سونىمەن قاتار، لاڭكەستىك ارەكەتتەردىڭ جولىن كەسۋ تەتىكتەرىن جەتىلدىرۋگە باعىتتالعان جاڭا جانە ءتيىمدى مەحانيزمدەر تاجىريبە جۇزىندە سىنالدى. بارلىق وقۋ تاپسىرمالارى تولىق كولەمدە ورىندالدى. اۋەجاي جۇمىسى ادەتتەگى رەجيمدە جالعاستى. اۋە رەيستەرى مەن جولاۋشىلار قوزعالىسىنا ەشقانداي كەدەرگى كەلتىرگەن جوق. بارلىق اۋە كەمەسى شتاتتىق جوسپارعا ساي ۇشىپ-قوندى.
