قويىلىم سىبايلاس جەمقورلىق ماسەلەسىنە جانە ونىڭ قوعامعا اسەرىنە نازار اۋدارۋعا ارنالعان.
2023 جىلدىڭ 28 قاراشاسىندا 9 جەلتوقسان - حالىقارالىق سىبايلاس جەمقورلىققا قارسى كۇرەس كۇنى قارساڭىندا اباي ۋنيۆەرسيتەتىنىڭ «ۇركەر» ستۋدەنتتىك تەاترىنىڭ «الما!» جاڭا قويىلىمى كورسەتىلدى، دەپ حابارلايدى Almaty-akshamy.kz
ءىس-شاراعا اباي اتىنداعى قازۇپۋ باسقارما توراعاسى-رەكتورى بولات تىلەپ، ق ر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ باسشىسى ارمان راحيموۆ، سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ پريەۆەنسيا باسقارماسىنىڭ باسشىسى قانات سالىمبايەۆ، ۋنيۆەرسيتەتتىڭ سىبايلاس جەمقورلىققا قارسى كومپلاەنس-قىزمەتىنىڭ باسشىسى سابىر تۇمەنبايەۆ، سونداي-اق قۇرىلىمدىق بولىمشەلەردىڭ باسشىلارى مەن ستۋدەنتتەرى قاتىستى.
يدەيانىڭ اۆتورى مەن قويىلىم رەجيسسەرلەرى فيلولوگيا ينستيتۋتىنىڭ 2 كۋرس ستۋدەنتتەرى مۇحتاروۆ ەرماحان مەن قارابالا دانيار. تەاتر قويىلىمى سىبايلاس جەمقورلىق ماسەلەسىن قوزعاپ، ونىڭ تۇلعاارالىق قارىم-قاتىناسقا، الەۋمەتتىك ادىلەتتىلىككە جانە نەگىزگى مورالدىق قۇندىلىقتارعا تيگىزەتىن اسەرىن اشىپ كورسەتىپ، كورەرمەندەرگە وسى الەۋمەتتىك قۇبىلىسقا جاڭا كوزقاراس پەن تۇسىنىك بەردى.
ءىس-شارا بارىسىندا بولات تىلەپ شارانىڭ ماڭىزدىلىعىنا توقتالىپ، ستۋدەنتتىك تەاتردىڭ قاتىسۋشىلارىنا تاماشا قويىلىمدارى ءۇشىن شىنايى العىسىن ءبىلدىردى. سونداي-اق ول ستۋدەنتتەردىڭ قوعام الدىنداعى جاۋاپكەرشىلىگىن ءتۇسىنىپ قانا قويماي، ۋنيۆەرسيتەت قابىرعاسىندا ادالدىق، پاراساتتىلىق، يماندىلىق سياقتى الەۋمەتتىك قۇندىلىقتاردى قالىپتاستىرىپ جاتقانىن جەتكىزدى. رەكتور بۇل ءىس-شارا ستۋدەنتتەردىڭ كاسىبي داعدىلارىن عانا ەمەس، ولاردىڭ قوعامداعى جاۋاپكەرشىلىگىن جانە سانالى ازاماتتىڭ ءرولىن ارتتىرۋداعى ماڭىزدى قادام ەكەنىن اتاپ ءوتتى.
ءىس-شارا سوڭىندا ارمان راحيموۆ ۋنيۆەرسيتەت رەكتورىنا جانە سىبايلاس جەمقورلىققا قارسى كومپلاەنس-قىزمەتىنىڭ قىزمەتكەرىنە، سونداي-اق «ۇركەر» ستۋدەنتتىك تەاترىنا العىس حاتتار تابىس ەتتى.