ينفەكسيا جۇقتىرۋ جاعدايلارىنىڭ سانى ازايدى.
پاندەميا جۋىق ارادا اياقتالۋى مۇمكىن. بۇل تۋرالى سارسەنبىدە جەنيەۆادا وتكەن بريفينگتە دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋس مالىمدەدى، دەپ حابارلايدى Almaty-akshamy.kz ق ر دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنە سىلتەمە جاساپ.
ونىڭ ايتۋىنشا، وتكەن اپتادا الەمدە COVID-19 سالدارىنان ءولىم-جىتىم 2020 جىلدىڭ ناۋرىزىنان بەرگى كورسەتكىشتەن مينيمۋمعا دەيىن ازايدى.
سپيكەر پاندەميامەن كۇرەستى مارافونمەن سالىستىردى: «ءبىز مارە سىزىعىن كورىپ وتىرمىز. جەڭىسكە جاقىنبىز. ءبىراق قازىرگى قاتەلىك جۇگىرۋدى توقتاتۋ بولار ەدى».
تەدروس گەبرەيەسۋس بارلىق ەلدى ءقاۋىپتى توپتاعى ازاماتتاردىڭ، سونىڭ ىشىندە مەديسينا قىزمەتكەرلەرى مەن قارتتاردى تولىعىمەن ۆاكسينالاۋعا شاقىردى. ونىڭ ايتۋىنشا، بۇل - ءاربىر مەملەكەتتەگى حالىقتىڭ كەمىندە 70% ۆاكسينالاۋعا قاتىستى ددۇ العا قويعان ماقساتقا جەتۋدەگى باسىم مىندەت.
ددۇ مالىمەتى بويىنشا، وتكەن اپتادا الەمدە 3،1 ميلليوننان استام ادام COVID-19 جۇقتىردى، شامامەن 11 مىڭ ادام قايتىس بولدى. ينفەكسيا جۇقتىرۋ جاعدايلارىنىڭ سانى الدىڭعى جەتى كۇنمەن سالىستىرعاندا 28%، ال ءولىم-جىتىم 22% ازايدى.