قازاقستاندا ەپيداحۋال ءالى جاقسارعان جوق. ەلىمىزدىڭ بارلىق ءوڭىرى قايتادان «قىزىل» ايماققا ءوتتى.
4 جارىم ميلليون ادام كوروناۆيرۋسقا قارسى ەكپە سالدىردى. ۆاكسينالاۋ قارقىنىن كۇشەيتۋگە ۇكىمەت تاراپىنان تاپسىرما بەرىلدى. ىندەتكە شالدىققان 1 808 ادامنىڭ جاعدايى اۋىر، 451 پاسيەنتتىڭ جاعدايى وتە اۋىر، 215 ناۋقاس ءوجج اپپاراتىندا جاتىر. ال، الەمدەگى احۋال قانداي؟ COVID-19 تارالۋىنا جول بەرمەۋ جونىندەگى ۆاك-تىڭ تەلەگرام كانالى دۇنيە جۇزىندەگى ەپيداحۋال جايىنداعى اقپارات تاراتتى، دەپ حابارلايدى Almaty-akshamy.kz ءتىلشىسى.
يراندا ىندەت جۇقتىرعانداردىڭ جالپى سانى 4 238 676 ادامعا جەتتى، دەپ حابارلايدى دەنساۋلىق ساقتاۋ مينيسترلىگى. وتكەن تاۋلىكتە عانا COVID-19 جۇقتىرۋدىڭ 39 139 جاڭا جاعدايى جانە 508 كوز جۇمۋ دەرەگى انىقتالدى. بۇگىنگى تاڭدا پاندەميا 95 111 ادامنىڭ ءومىرىن قيدى. 11 تامىزداعى جاعداي بويىنشا، بۇكىل ەل بويىنشا 13 520 127 ادام COVID-19 ۆاكسيناسىنىڭ كەم دەگەندە ءبىر دوزاسىن الدى، 3 274 980 ادام ۆاكسيناسيانىڭ تولىق كۋرسىنان ءوتتى.
اقش-تا پاندەميا باستالعاننان بەرى شامامەن 36 ميلليون كۆي ينفەكسياسىن جۇقتىرۋ دەرەگى تىركەلدى. التى ايدا العاش رەت كۇنىنە 100 مىڭنان استام جاڭا ينفەكسيا جۇقتىرۋ جاعدايى انىقتالدى. ءبىر ايدا اۋرۋحاناعا جاتقىزۋ كورسەتكىشى 8 ەسەگە ءوستى. 50 اۋرۋحانا بيلىك ورگاندارىنان كومەك سۇراۋدا. اۋرۋحانالاردا پاسيەنتتەردىڭ اعىنىمەن كۇرەسۋ ءۇشىن قىزمەتكەرلەر جەتىسپەيدى. دارىگەرلەر "دەلتا" شتامى اسەرىنەن پاسيەنتتەردىڭ جاس شاماسى ەداۋىر جاسارعانىن، 40 جاسقا دەيىنگى ادامداردىڭ رەانيماسياعا ءتۇسىپ جاتقانىن، بالالار اراسىندا ينفەكسيا كۇننەن كۇنگە ارتىپ كەلە جاتقانىن ايتادى. اۋرۋعا شالدىعۋ جاعدايلارىنىڭ كوپشىلىگى لۋيزيانا، فلوريدا، تەحاس، الاباما شتاتتارىندا ورىن الۋدا.
رەسەيلىك عالىم ەلدەگى COVID-19 بويىنشا جاڭا تولقىننىڭ بولۋى مۇمكىن مەرزىمدەرىن اتادى. ۆيرۋسولوگ ەۆگەنيي تيماكوۆ اۋرۋدىڭ جاڭا ءورشۋى تۋرالى ەسكەرتتى. ونىڭ پىكىرىنشە، ەپيدەميولوگيالىق جاعدايدىڭ جاقسارعانىنا قاراماستان، ۆيرۋس جۇقتىرعانداردىڭ سانى قىركۇيەكتىڭ سوڭىندا دەمالىس ماۋسىمى اياقتالىپ، بارلىعى ۇيلەرىنە ورالعان كەزدە وسەدى. وتكەن تاۋلىكتە رەسەيدە 21 378 COVID-19 جۇقتىرۋ دەرەگى تىركەلدى. ەپيدەميا كەزىندە ەلدە بارلىعى 6 491 288 جاعداي انىقتالدى، ولاردىڭ 166 442ء-سى قايتىس بولدى.
تايلاندتا ءبىر كۇندە 235 ادام كوروناۆيرۋستان قايتىس بولدى. الدىڭعى ءولىم-جىتىمنىڭ ماكسيمالدى تاۋلىكتىك ءوسۋى 7 تامىزدا تىركەلگەن بولاتىن - 212 جاعداي. SARS-CoV-2 قۇرباندارىنىڭ جالپى سانى 6 588 ادامعا جەتتى. وتكەن تاۋلىكتە COVID-19 جۇقتىرۋدىڭ جاڭا 843 جاعدايى انىقتالدى. ەلدە ىندەتكە شالدىققانداردىڭ جالپى سانى 795 951-گە جەتتى. يممۋنداۋ باستالعاننان بەرى تايلاندتا COVID-19 ۆاكسيناسىنىڭ 21 ميلليوننان استام دوزاسى ەنگىزىلدى. بانگكوك پەن پحۋكەت تۋريستىك ورتالىعى حالقىنىڭ 70%-دان استامى ۆيرۋسقا قارسى ەگىلدى.