ۇلى وتان سوعىسى جىلدارى جوعالىپ كەتكەن 1000-نان استام جاۋىنگەردى تابىلعان
«اتامنىڭ اماناتى» قوعامدىق بىرلەستىگى وسى ۋاقىتقا دەيىن ۇلى وتان سوعىسى جىلدارى جوعالىپ كەتكەن 1000-نان استام جاۋىنگەردى تاپقان. اراعا 80 جىل سالىپ 2 سوعىس ارداگەرىنىڭ سۇيەگى رەسەيدەن الماتىعا جەتكىزىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قان مايداندا جاۋمەن ارپالىسىپ، وتان ءۇشىن قازا بولعانداردىڭ سۇيەگى تۇبىندە ەلگە جەتتى. سولاردىڭ ءبىرى نيكولاي گۋروۆ ستالينگراد تۇبىندەگى شايقاستا اتتى اسكەردى باسقارىپ، ەرلىكتىڭ ۇلگىسىن كورسەتكەن. الايدا 1942 جىلى حاتى ءۇزىلىپ، حابارسىز كەتكەن. ال ۆورونەج ماڭىنان تابىلعان تورەگەلدى ۇركىربايەۆتىڭ تۋىستارى بولماعاندىقتان ونىڭ جەرلەۋ ءراسىمىن جامبىل اۋدانى اكىمشىلىگى ءوز موينىنا العان.
«تۋىستارىمنىڭ ايتۋىنشا، ول اۋەلى وقۋعا كەتكەن. سول ۋاقىتتا سوعىس باستالىپ، ءارى قاراي مايدانعا اتتانىپتى. باسىندا ۇيدەگىلەرگە حات جىبەرىپ تۇراتىن، كەيىن حابار-وشارسىز جوعالىپ كەتكەن. ەندى قازىرگى قۇجاتتاردان قاراساق ول كىسى باتىرلىقتىڭ ناعىز ۇلگىسىن كورسەتىپتى. اعاممەن ماقتانامىن. شىنى كەرەك ونى تابا المايمىز دەپ كۇدەر ۇزگەن ەدىك»، – دەدى ن. گۋروۆتىڭ تۋىسى الەكساندر گوربوۆسكيي.
قۇرىلعانىنا 3 جىل بولعان «اتامنىڭ اماناتى» قوعامدىق بىرلەستىگىنىڭ كومەگىنە 5 مىڭنان استام قازاقستاندىق جۇگىنگەن. ءتىپتى كورشىلەس قىرعىزستان، وزبەكستان، رەسەيدەن تۋىستارىن ىزدەۋشىلەر كوپ حابارلاساتىن كورىنەدى. قىزمەتىنە اقى المايتىن ەرىكتىلەر بۇل مىندەتىن ابىروي سانايدى.
«ىزدەستىرۋ كەزىندەگى قيىندىقتار سايتتا قۇجات كوپ شىققان. ءبىراق اتى-جوندەرى قاتە جازىلعان. ەندى ءبىز سول ءۇشىن ارنايى وقىدىق. ىزدەستىرۋ كەزىندە قاتە جازىلعان فاميليالاردى تاۋىپ، سونىمەن اينالىسامىز»، – دەدى «اتامنىڭ اماناتى» قوعامدىق بىرلەستىگىنىڭ وكىلى مەيىرحان بايباتىروۆا.
«وسى كىسىلەردىڭ باتىلدىعى، سول كەزدەگى ەرلىگىن كەلەسى ۇرپاققا جەتكىزۋ ءۇشىن تاربيە جانە يدەولوگيالىق باعىتتا جۇمىستار جۇرگىزىلىپ جاتىر»، – دەدى دەسانتتىق-شابۋىلداۋ بريگاداسىنىڭ اسكەري قىزمەتشىسى ەركەبۇلان سماعۇلوۆ.
بيىل ەلگە ۇلى وتان سوعىسىنا قاتىسقان 11 وتانداسىمىزدىڭ سۇيەگى اكەلىنىپ، جەر قوينىنا تاپسىرىلدى. بۇل – بالانىڭ بابا الدىنداعى، تاريح الدىنداعى مىندەتى.