چەحيادان كەلگەن ازامات قازاق ادەبيەتىن وقىپ ءجۇر

پالاسك ۋنيۆەرسيتەتىنىڭ ماگيسترانتى يان برزوبوگاتى تورايعىروۆ ۋنيۆەرسيتەتىنە ءبىلىم الۋعا كەلدى.

ول Erasmus + باعدارلاماسى بويىنشا ازيا ەلدەرى جانە قازاق ادەبيەتىن وقىپ ءجۇر، دەپ حابارلايدى Almaty-akshamy.kz قازاقپاراتقا سىلتەمە جاساپ. 

اكادەميالىق ۇتقىرلىق باعدارلاماسى بويىنشا چەحيادان كەلگەن ماگيسترانت پاۆلودار جوعارى وقۋ ورنىن ءوزى تاڭداعان. مۇندا ول «ازياتيستيكا بويىنشا ماماندانعان جۇڭگو ءتىلى مەن مادەنيەتى» ماماندىعى بويىنشا ءۇش ايلىق وقۋدان وتەدى. سونىمەن قاتار، يان برزوبوگاتى حح عاسىرداعى قازاق ادەبيەتىن زەرتتەۋ جايلى شەشىم قابىلدادى. اتاپ ايتقاندا، ءسابيت مۇقانوۆ پەن ساكەن سەيفۋلليننىڭ شىعارمالارىنا قىزىققان.

«ءبىز ەۋروپادان كەلگەن ستۋدەنتتەر مەن ماگيسترانتتاردىڭ ءوز باعىتىندا جاڭا ءبىلىم الۋ جانە قازاقستان مادەنيەتىن زەرتتەۋ ءۇشىن ToU-دى تاڭداعانىنا وتە قۋانىشتىمىز. ءبىز ءارقاشان شەتەلدىك قوناقتار ءۇشىن اشىقپىز جانە ولارعا وقۋدا دا، كۇندەلىكتى ومىردە دە كومەكتەسۋگە دايىنبىز. بۇگىنگى تاڭدا ءبىزدىڭ ۋنيۆەرسيتەت شەتەلدە تانىمال بولا باستادى. بۇل بولاشاقتا باسقا ەلدەردەن كەلەتىن ستۋدەنتتەر مەن ماگيسترانتتار اعىنى وسەتىنىن بىلدىرەدى»، – دەپ اتاپ ءوتتى جوو رەكتورى ەركىن سادىقوۆ.

ToU جانە پالاسك ۋنيۆەرسيتەتى 2014 جىلدان بەرى سەرىكتەس. بۇل ىنتىماقتاستىق پروفەسسورلاردىڭ قوناق دارىستەرىن جانە ستۋدەنتتەردىڭ ەكىجاقتى عىلىمي تاعىلىمدامالارىن قامتيدى. جالپى، تورايعىروۆ ۋنيۆەرسيتەتى 100-دەن استام جوعارى وقۋ ورنىمەن سەرىكتەس.

«ايتا كەتسەك، تەك 2022 جىلى بىزدە نيگەريا، جۇڭگو، موڭعوليا، رەسەي، گەرمانيا، وزبەكستان، ءازىربايجان، ۋكراينا، يزرايل، گرۋزيا، اۋعانستان، يراك، ت.ب. ەلدەردەن 239 شەتەلدىك ستۋدەنت تۇراقتى نەگىزدە وقىدى»،-دەلىنگەن حابارلامادا.