بيىلعى 2022 جىلدىڭ ناۋرىز ايىنىڭ باستالۋىمەن قاتار قوعامنىڭ ساياسي ومىرىنە دە ءبىرشاما وزگەرىستەر ەنە باستادى. جاڭا، جاڭعىرعان قازاقستاندى قالىپتاستىرۋدى ماقسات ەتىپ وتىرعان مەملەكەتىمىزدىڭ جەتەكشى پارتياسى ءوزىنىڭ Nur Otan اتاۋىن «اماناتقا» اۋىستىردى.
بۇل قادام جونىندەگى اقپارات ەلىمىزدىڭ جۇرتشىلىعى ءۇشىن ءوزىنىڭ كەزەكتەن تىس سەزىنىڭ ءماجىلىس ناتيجەلەرىنەن بەلگىلى بولدى. ارينە، جاڭا اتاۋمەن قاتار قوعامدا جاڭا ماعىنالىق، الەۋمەتتىك-پراكتيكالىق وزگەرىستەردىڭ ورىن الاتىنان ۇمىتتەنەمىز. سەبەبى، قوعامدا بۇرىنعى Nur Otan دەپ اتالعان پارتيانىڭ جۇمىس ىستەۋ ءستيلىن كەڭەستەر داۋىرىندەگى كوممۋنيستىك پارتيانىڭ ىس-قيمىلدارىمەن تەڭگەرەتىن باعالاۋلار، سىني كوزقاراستار بار ەكەنىن جوققا شىعارا المايمىز. سوندىقتان قوعامداعى جۇيەلى جاڭعىرۋدى باسقارا الاتىنداي جانە ونى ماكسيمالدى تۇردە جاڭا تالاپتارعا ساي جۇزەگە اسىرا الاتىنداي «امانات» پارتياسىندا قابىلەتتەر مەن نيەتتەر بولىپ جاتسا، وندا جالپى قازاقستاندىق قوعامنىڭ ءۇمىتىنىڭ اقتالعانى.
جالپى، بارلىق پارتيالاردىڭ جۇمىستارى ءبىر سارىندى ءىس-شارالار باعدارلامالارىن ورىنداۋمەن كومكەرىلىپ جاتادى. الدىمەن، پارتيا مۇشەلەرىنىڭ باستاۋىش ۇيىمدارى جۇرتشىلىقپەن، جەكەلەگەن ازاماتتارمەن تىكەلەي سۇحباتقا بارۋ، ۇكىمەت الدىندا كۇردەلى دە وزەكتى ماسەلەلەردى قويا ءبىلۋ قابىلەتىنە يە بولۋى قاجەت. ونسىز پارتيانىڭ قوعامداعى بەدەلى كوتەرىلمەيدى، حالىقتىڭ سەنىمىنە يە بولا المايدى.
قازىرگى كەزەڭدەگى ەڭ ۇلكەن ماسەلەلەردىڭ ءبىرى – حالىق پەن بيلىكتىڭ اراسىنداعى قاتىناستاردى ۇيلەستىرۋ، ءوزارا جاقىنداستىرۋ، سىندارلى سۇحباتتىق دەڭگەيدەگى تالقىلاۋلاردى جۇرگىزۋ. مىنە، سوندا عانا قوعامىمىز الەۋمەتتىك جانە رۋحاني پروگرەسس، دامۋ جولىندا قوماقتى جەڭىستەرگە جەتۋگە مۇمكىندىكتەر الادى جانە كوپتەگەن ساياسي-ەكونوميكالىق، دۇنيەتانىمدىق قايشىلىقتاردى ۋاقىتىلى شەشىپ وتىرادى.