ەلشى ءالىم بايەل اۋىل شارۋاشىلىعى سالاسىنداعى قازاقستان-ازەربايجان ىنتىماقتاستىعىنىڭ زور الەۋەتىنە توقتالدى.
2024 جىلعى 25 شىلدەدە قازاقستاننىڭ ازەربايجانداعى ەلشىلىگىندە اۋىل شارۋاشىلىعى جانە اگروونەركاسىپ سەكتورلارىنداعى ەكىجاقتى ىنتىماقتاستىقتى جانداندىرۋعا باعىتتالعان قازاق-ازەربايجان بيزنەس-فورۋمى ءوتتى، دەپ حابارلايدى aqshamnews.kz
ءىس-شاراعا قازاقستاننىڭ ازەربايجانداعى ەلشىسى ءالىم بايەل، ازەربايجان اۋىل شارۋاشىلىعى مينيسترلىگى جانىنداعى اۋىل شارۋاشىلىعى يننوۆاسيالار ورتالىعىنىڭ ديرەكتورى انار دجافاروۆ، قازاقستان مەن ازەربايجاننىڭ اۋىل شارۋاشىلىعى مينيسترلىكتەرىنىڭ وكىلدەرى، «ازىق-تۇلىك كەلىسىم شارت كورپوراسياسى» ۇلتتىق كومپانياسىنىڭ باسقارما ءتوراعاسى اسىلحان دجۋۆاشيەۆ، ازەربايجان شاعىن جانە ورتا بيزنەستى دامىتۋ اگەنتتىگى (KOBIA)، ازەربايجاننىڭ ەكسپورت پەن ينۆەستيسيانى ىنتالاندىرۋ اگەنتتىگىنىڭ (AZPROMO) وكىلدەرى، سونداي-اق اۋىل شارۋاشىلىعى ءوندىرىسى، مال، قۇس، بالىق شارۋاشىلىعى، ۆەتەريناريا جانە ورگانيكالىق تىڭايتقىشتار وندىرىسىندە ماماندانعان ءبىرقاتار قازاقستاندىق جانە ازەربايجاندىق كومپانيالار قاتىستى.
ەلشى ءالىم بايەل ءوز سوزىندە قازاقستان مەن ازەربايجان ستراتەگيالىق سەرىكتەستىك اياسىندا ەكونوميكانىڭ كوپتەگەن سالالارىندا تابىستى ءوزارا ءىس-قيمىل جاساپ جاتقانىن اتاپ ءوتتى. بۇل تۇرعىدا ول اۋىل شارۋاشىلىعى سالاسىنداعى قازاقستان-ازەربايجان ىنتىماقتاستىعىنىڭ زور الەۋەتىنە توقتالدى. جالپى، 2023 جىلى قازاقستان سىرتقى نارىققا 9 ميلليون توننا استىق پەن 24،4 مىڭ توننا ەت ەكسپورتتاعان.
ديپلومات سونداي-اق يسلام ازىق-تۇلىك قاۋىپسىزدىگى ۇيىمىنىڭ قىزمەتى تۋرالى ايتىپ، ازەربايجاننىڭ جاقىن ارادا وعان قوسىلاتىنىنا سەنىم ءبىلدىردى. ءا.بايەل قازاقستاننىڭ اگروونەركاسىپتىك كەشەنگە، اسىرەسە استىقتى تەرەڭ وڭدەۋ جانە باسقا دا ونىمدەردى وڭدەۋ سالاسىنا سالىناتىن ينۆەستيسيالاردى قولدايتىنىن اتاپ ءوتتى. ول سونداي-اق قازاقستاننىڭ قاراباقتا اۋىل شارۋاشىلىعى جوبالارىن جۇزەگە اسىرۋعا قىزىعۋشىلىق تانىتىپ وتىرعانىن ايتتى.
ءوز كەزەگىندە انار دجافاروۆ ازەربايجان ەكى ەل اراسىنداعى اۋىل شارۋاشىلىعى كووپەراسياسىن دامىتۋدىڭ ءتيىمدى تەتىكتەرىن قولداۋعا دايىن ەكەنىن اتاپ ءوتتى. دجافاروۆ سونداي-اق تۇركى مەملەكەتتەرى ۇيىمى اياسىنداعى ەلدەرىمىزدىڭ اۋىل شارۋاشىلىعى سالاسىنداعى جەمىستى ىنتىماقتاستىعىن اتاپ ءوتتى. 
فورۋم بارىسىندا بيزنەس-قاۋىمداستىق وكىلدەرى ءوز قىزمەتى تۋرالى ايتىپ، اۋىل شارۋاشىلىعى سالاسىن دامىتۋدىڭ وزەكتى ماسەلەلەرى تالقىلانىپ، ەكىجاقتى ىنتىماقتاستىقتى ارتتىرۋ بويىنشا يدەيالار ۇسىنىلدى. شارا بارىسىندا ەكى ەلدىڭ كومپانيالارى اراسىندا B2B فورماتىندا ءبىرقاتار كەزدەسۋلەر ءوتتى.