ۇكىمەتتە «KAZAKH INVEST» كومپانياسىنىڭ ءبىر جىلعى جۇمىسى قارالدى.
2021 جىلدىڭ قورىتىندىسى بويىنشا، قازاقستانعا تىكەلەي شەتەلدىك ينۆەستيسيالار كولەمى پاندەمياعا دەيىنگى دەڭگەيگە جەتتى. بۇل تۋرالى ۇكىمەت باسشىسى ءاليحان سمايىلوۆتىڭ توراعالىعىمەن وتكەن «KAZAKH INVEST» ۇلتتىق كومپانياسى» اق ديرەكتورلار كەڭەسىنىڭ وتىرىسىندا ايتىلدى، دەپ حابارلايدى اlmaty-akshamy.kz.
وتىرىستا كومپانيانىڭ 2021 جىلعى قىزمەتىنىڭ قورىتىندىلارى قارالدى، 2021 جىلعا ارنالعان قارجىلىق ەسەپ الدىن الا ماقۇلداندى. سونداي-اق ەسەپ ساياساتى جانە قارجى رەسۋرستارىن باسقارۋ ساياساتى سەكىلدى جاڭا رەداكسياداعى ءبىرقاتار ىشكى قۇجاتتار بەكىتىلدى. ىشكى اۋديت قىزمەتىنىڭ جانە سىبايلاس جەمقورلىققا قارسى كومپلاەنس-قىزمەتىنىڭ 2022 جىلعى ءى توقسانداعى ەسەپتەرى قارالدى.
باسقارما ءتوراعاسى مەيىرجان يۋسۋپوۆتىڭ ايتۋىنشا، «KAZAKH INVEST» كومپانياسىنىڭ قولداۋىمەن 2021 جىلى 5 مىڭ جۇمىس ورنىن قۇرا وتىرىپ، 3،8 ملرد دوللاردان استام سوماعا 57 جوبا ىسكە اسىرىلدى. وندىرىستىك الاڭداردى ارالاۋمەن شەتەلدىك ينۆەستورلاردىڭ قازاقستان وڭىرلەرىنە 190-نان استام ساپارى ۇيىمداستىرىلدى. ولاردىڭ اياسىندا مەملەكەتتىك ورگاندارمەن جانە جەرگىلىكتى بيزنەس وكىلدەرىمەن كەلىسسوزدەر جۇرگىزىلدى.
2021 جىلدىڭ قورىتىندىسى بويىنشا، قازاقستانعا تىكەلەي شەتەلدىك ينۆەستيسيالاردىڭ جالپى اعىنى پاندەمياعا دەيىنگى دەڭگەيگە جەتىپ، 23،7 ملرد دوللاردى قۇرادى.
ەل باسشىلىعىنىڭ تاپسىرماسى بويىنشا ق ر اۋماعىندا حالىقارالىق كومپانيالاردىڭ ءوندىرىسىن جەرگىلىكتەندىرۋ ماقساتىندا كەڭ اۋقىمدى جۇمىس جۇرگىزىلىپ جاتىر. الەمنىڭ 30-عا جۋىق ەلىنەن شيكىزاتتىق ەمەس سالالاردىڭ 200-دەن استام كومپانياسىنا ينۆەستيسيالىق ۇسىنىس-پاكەتتەر جولداندى. مۇددەلى كومپانيالارمەن بەلسەندى تۇردە كەلىسسوزدەر جۇرگىزىلىپ جاتىر.
سونداي-اق ق ر پرەمەر-مينيسترىنە «KAZAKH INVEST» كومپانياسىنىڭ شەتەلدەگى وكىلدەرىنىڭ قىزمەتىنىڭ ناتيجەلەرى تۋرالى باياندالدى. شەتەلدەگى وكىلدەر جۇمىسىنىڭ تيىمدىلىك كورسەتكىشتەرى جىل سايىن پرەمەر-مينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردى ءتوراعالىق ەتەتىن كەڭەستە قارالادى. بۇل باعىتتاعى جۇمىس شەتەلدىك وكىلدەر بار وڭىرلەردە پاندەميالىق شەكتەۋلەردىڭ بىرتىندەپ الىنۋىنىڭ ناتيجەسىندە جاندانىپ جاتقانى اتاپ ءوتىلدى.