2024 جىلى ءىىم ەكسترەميزمگە قارسى كۇرەس بولىمشەلەرىنىڭ قىزمەتكەرلەرى ءدىني جانە ۇلتتىق ارازدىق قوزدىرۋ، تەرروريزمدى ناسيحاتتاۋ جانە ەكسترەميستىك ۇيىمدارعا قاتىستى 85 قىلمىستى انىقتادى، دەپ حابارلايدى aqshamnews.kz.
تەرگەۋ ناتيجەسىندە جىل سوڭىندا 44 ادام قىلمىستىق جاۋاپكەرشىلىككە تارتىلدى.
«سونىمەن قاتار، ۇرلىق، بوپسالاۋ، توناۋ جانە ت.ب. سياقتى قاراپايىم قىلمىستاردى جاساعان 131 ءدىني راديكال ۇستالىپ، 18 قىلمىستىق توپتىڭ ارەكەتى توقتاتىلدى، ولاردان 50 قارۋ مەن 10 كەلىدەن استام ەسىرتكى تاركىلەندى» دەپ جازىلعان حابارلامادا.
بۇل تۋرالى قازاقستان رەسپۋبليكاسى ىشكى ىستەر مينيسترلىگىنىڭ باسپا ءسوز قىزمەتى حابارلادى.
سونداي-اق، ءدىني قاتىناستار سالاسىنداعى قۇقىق بۇزۋشىلىقتار مەن تىيىم سالىنعان ماتەريالداردى تاراتقانى ءۇشىن 390 ادام اكىمشىلىك جاۋاپكەرشىلىككە تارتىلدى.
بۇل رەتتە ءتارتىپ ساقشىلارى قورعاۋدى قامتاماسىز ەتۋگە باسا نازار اۋداردى. جىل ىشىندە 9930 تەرروريستىك تۇرعىدان وسال نىساننىڭ قاۋىپسىزدىك جاعدايى تەكسەرىلدى. بۇزۋشىلىقتاردى جويۋ تۋرالى 3581 ۇيعارىم شىعارىلىپ، 1244 اكىمشىلىك حاتتاما تولتىرىلدى.
2024 جىلدىڭ قاراشاسىندا قازاقستاندا ەلدىڭ بىرنەشە وبلىسىنداعى تۇرمەلەردە لاڭكەستىك ارەكەت دايىنداپ جاتقان راديكالدى يسلامشىلدار ۇياسى اشىلدى. كۇدىكتىلەر جازاسىن وتەپ جاتقان جەرلەردى ءتىنتۋ كەزىندە سۋىق قارۋلار، سمارتفوندار جانە باسقا دا زاتتاي ايعاقتار تاركىلەندى.