ساراپشىلار ۇشقىشسىز باسقارىلاتىن اپپاراتتار بولىمشەلەرىنىڭ ءىس-قيمىلىن باعالادى
بۇۇ-نىڭ ساراپشىلارى قازاقستان بىتىمگەرلىك كونتيگەنتتىڭ دايىندىعىنا باعا بەردى، دەپ حابارلايدى Almaty-akshamy.kz قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
قازاقستانعا بۇۇ-نىڭ بەيبىتشىلىكتى قولداۋ وپەراسيالارى دەپارتامەنتىنىڭ ساراپشىلارى كونسۋلتاتيۆتىك ساپارمەن كەلدى. بىتىمگەرشىلىك دايىندىق ورتالىعىنا (قازسەنت) بارۋداعى باستى ماقساتى – ونىڭ قىزمەتىمەن تانىسۋ جانە قازاقستاندىق بىتىمگەرشىلىك كونتينگەنتتىڭ دايىندىق الەۋەتىنىڭ جۇيەسى شەڭبەرىندە بۇۇ-نىڭ بەيبىتشىلىكتى قولداۋ جونىندەگى وپەراسيالارىنا قاتىسۋعا دايىندىعىن ايقىنداۋ.
ساراپشىلار بىتىمگەرلەردىڭ وقۋ پروسەسىنىڭ نەگىزگى باعىتتارىن، سونىڭ ىشىندە اعىلشىن ءتىلىن وقىتۋ مەن حالىقارالىق گۋمانيتارلىق قۇقىق نورمالارىن زەردەلەدى.
الماتى وبلىسىنىڭ تىلەندييەۆ اۋىلىنداعى بىتىمگەرلەردى دايىنداۋ وقۋ-جاتتىعۋ ورتالىعىندا پراكتيكالىق ءىس-قيمىلدار كورسەتىلدى.
بىرىكككەن بولىمشەنىڭ باقىلاۋ-وتكىزۋ جانە قاداعالاۋ پۋنكتتەرىندە قىزمەت اتقارۋ، گۋمانيتارلىق جۇكتى الىپ ءجۇرۋ، ماڭىزدى وبەكتىلەردى كۇزەتۋ، جەرگىلىكتى حالىقتى قورعاۋ جونىندەگى ءىس-شارالار كەشەنىن وتكىزۋ جانە سول ايماقتى پاترۋلدەۋ تاپسىرمالارىن پىسىقتادى.
ساراپشىلار ۇشقىشسىز باسقارىلاتىن اپپاراتتار بولىمشەلەرىنىڭ ءىس-قيمىلىن، ولاردىڭ تەحنيكالىق مۇمكىندىكتەرىن، ولاردى باقىلاۋ جانە اقپارات جيناۋ قابىلەتىن باعالادى.
ينجەنەرلىك-ساپەرلىك بولىمشەلەردىڭ ماماندارى قولدان جاسالعان جارىلعىش زاتتاردى تابۋ جانە ولاردى جويۋ ءىس-قيمىلدارىن ورىندادى.
قورعانىس مينيسترلىگىنىڭ اسكەري مەديسينا ورتالىعىندا بولعان بۇۇ-نىڭ وكىلدەرى ق ر قك اسكەري قىزمەتشىلەرىنىڭ اسكەري-مەديسينالىق دايىندىق دەڭگەيىن كوردى.
ساپاردىڭ قورىتىندىلارى بويىنشا بۇۇ-نىڭ بىتىمگەرشىلىك الەۋەتىنىڭ ازىرلىك جۇيەسىنىڭ ىلگەرىلەۋ مۇمكىندىگىنە، قارۋ-جاراقپەن، اسكەري جانە ارنايى تەحنيكامەن، مەديسينالىق، تىلدىق جانە باسقا دا مۇلىكپەن جاراقتاندىرىلۋىنا، سونداي-اق قازاقستاننىڭ بىتىمگەرشىلىك كونتينگەنتىنىڭ دايىندىق دەڭگەيىنە الدىن الا باعا بەرىلەتىن بولادى.