قازاقستاننىڭ سىرتقى ىستەر ءمينيسترىنىڭ ءبىرىنشى ورىنباسارى قايرات وماروۆ قازاقستانعا جۇمىس ساپارى اياسىندا بۇۇ باس حاتشىسىنىڭ زاڭ ۇستەمدىگى جانە بەيبىتشىلىكتى قولداۋ ماسەلەلەرى جونىندەگى كومەكشىسى الەكساندر زۋيەۆپەن كەزدەستى.
كەزدەسۋ بارىسىندا تاراپتار قازاقستان مەن بۇۇ اراسىنداعى ۇيىمنىڭ بىتىمگەرشىلىك قىزمەتى باعىتىنداعى ىنتىماقتاستىقتىڭ قازىرگى جاعدايى مەن پەرسپەكتيۆالارىن تالقىلادى، دەپ حابارلايدى اlmaty-akshamy.kz.
ق. وماروۆ قازاقستاننىڭ بۇۇ-نىڭ حالىقارالىق بەيبىتشىلىك پەن قاۋىپسىزدىكتى نىعايتۋ جونىندەگى كۇش-جىگەرىن قولدايتىنىن اتاپ ءوتتى. قازاقستاندىق اسكەري كونتينگەنتتىڭ ۇيىمنىڭ ليۆانداعى، باتىس ساحاراداعى، ورتالىق افريكا رەسپۋبليكاسىنداعى جانە كونگو دەموكراتيالىق رەسپۋبليكاسىنداعى بىتىمگەرشىلىك ميسسيالارىنا قاتىسۋى تۋرالى حاباردار ەتتى.
قازاقستان بۇۇ-مەن، ونىڭ ىشىندە بۇۇ-نىڭ بىتىمگەرشىلىك بويىنشا سەرتيفيكاتتالعان كۋرستارى وقىتىلاتىن ق ر قم وڭىردەگى جالعىز «قازسەنت» بىتىمگەرشىلىك دايارلىق ورتالىعىنىڭ بازاسىندا تىعىز ىنتىماقتاستىقتا ەكەنىن اتاپ ءوتتى.
ا. زۋيەۆ قازاقستاننىڭ وسى باعىتتاعى ۇلەسىن جوعارى باعالادى، سونداي-اق بۇۇ-نىڭ بىتىمگەرشىلىك ميسسيالارىنا ق ر پوليسيا قىزمەتكەرلەرىنىڭ قاتىسۋ مۇمكىندىگىن قوسا العاندا، ءوزارا ءىس-قيمىلدى نىعايتۋعا ىقپال ەتۋگە دايىن ەكەنىن ءبىلدىردى.
ءوز ساپارى اياسىندا ا.زۋيەۆ ق ر بەيىندى مەملەكەتتىك ورگاندارىمەن كەزدەسۋلەر وتكىزدى.