بۇۇ باس اسسامبلەياسى قاسيەتتى كىتاپتاردى قورلاۋ جونىندەگى كەز-كەلگەن اكتىلەردى ايىپتايتىن جانە مۇنداي ارەكەتتەردى حالىقارالىق قۇقىق نورمالارىن بۇزۋ دەپ تانيتىن قاۋلى قابىلدادى.
ماروككو باستاماشى بولعان قۇجاتتى بۇۇ باس اسسامبلەياسى ءبىراۋىزدان قابىلدادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قاۋلىدا اتاپ ايتقاندا، «ادامدارعا قاتىستى بارلىق زورلىق-زومبىلىق اكتىلەرى ءدىني كوزقاراستارى نەمەسە سەنىمدەرى نەگىزىندە، سونداي-اق ولاردىڭ ءدىني رامىزدەرىنە، قاسيەتتى كىتاپتارىنا، ۇيلەرىنە، كاسىپورىندارىنا، مۇلكىنە، مەكتەپتەرىنە، مادەني ورتالىقتارىنا نەمەسە عيبادات ەتۋ ورىندارىنا قارسى باعىتتالعان كەز كەلگەن ارەكەتتەرى، سونداي-اق ءدىني ورىندارعا جاسالعان بارلىق شابۋىل» قاتاڭ تۇردە ايىپتالادى.
سونداي-اق قۇجات اۆتورلارى مۇسىلمانداردىڭ قاسيەتتى كىتابى – قۇرانعا قارسى ارانداتۋشىلىقتى ايىپتاۋعا شاقىرىپ، ولاردى «ءدىني وشپەندىلىك اكتىلەرى» دەپ سيپاتتادى.
25 شىلدەدە كوپەنگاگەندەگى ەگيپەت جانە تۇركيا ەلشىلىكتەرىنىڭ الدىندا قۇراندى ورتەۋ اكسياسى وتكەن. ءدال وسىنداي اكسيا ءبىر كۇن بۇرىن يراك ەلشىلىگىنىڭ الدىندا دا وتكەن. مۇسىلمان ليدەرلەرى مەن ساياساتكەرلەرى مۇنداي ارانداتۋشىلىقتاردىڭ ءسوز بوستاندىعى تۋرالى زاڭداردا قامتىلمايتىنىن باسا ايتتى.