ۋكراينانىڭ 16 ملن تۇرعىنى سۋدان باسپاناعا دەيىن گۋمانيتارلىق كومەككە مۇقتاج. بۇل تۋرالى بۇگىن كييەۆتەگى باسپا ءسوز ءماسليحاتىندا بۇۇ ۋكرايناداعى گۋمانيتارلىق ماسەلەلەر جونىندەگى ۇيلەستىرۋشىسى وسنات لۋبراني ءمالىم ەتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
بۇۇ گۋمانيتارلىق مەكەمەلەر جۇيەسى سەرىكتەس ۇيىمدارمەن جانە ۋكراينالىق ەرىكتىلەرمەن بىرگە ولاردى قۇتقارۋ ءۇشىن بار كۇشىن سالۋدا.
«سوڭعى ءتورت ايدا ۋكراينا بۇكىل الەمنىڭ نازارىندا بولدى. بۇل ارينە جاقسى جاعىنان ەمەس. رەسەيدىڭ ۋكرايناعا قارسى سوعىسى باستالعالى بۇل ەلدەگى ءار ايەلدىڭ، ءار ەركەكتىڭ جانە ءار بالانىڭ ءومىرى قۇرتىلدى: ولاردىڭ جاقىندارى ءولتىرىلدى، جاراقات الدى، وتباسىنان ايىرىلدى، مىڭداعان ۇيگە بومبا تاستالدى. بۇل ازاپتى سوزبەن ايتىپ جەتكىزۋ مۇمكىن ەمەس»، - دەپ اتاپ ءوتتى وسنات لۋبراني.
ول بۇگىندە 16 ملن ۋكراينالىقتىڭ گۋمانيتارلىق كومەككە – سۋعا، تاماققا، مەديسينالىق كومەككە نەمەسە باسپاناعا مۇقتاج ەكەنىن ايتتى.
«بۇل تەك ىقتيمال بولجام. ءقازىر بۇۇ سەرىكتەستەرىمىزبەن بىرگە قايتا قاراپ جاتىر. التى ميلليوننان استام ادام ىشكى كوشىپ-قونىپ جۇرگەندەر قاتارىندا. بەس ميلليونعا جۋىق ادام تۋعان جەرىنە قايتا ورالدى، ءبىراق ولار قايتا كەتۋگە ءماجبۇر بولاتىندارىن ءتۇسىنىپ وتىر. 5،3 ملن ۋكراينالىق باسقا ەلدەرگە بوسقىن بولىپ كەتتى»، - دەدى بۇۇ ۇيلەستىرۋشىسى.