قازاقستان – تۇراقتىلىقتىڭ سيمۆولى.
بۇۇ باس اسسامبلەياسىنىڭ 76-سەسسياسىنا قاتىسۋ شەڭبەرىندە ق ر پرەمەر-مينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى بۇۇ باس حاتشىسى انتونيۋ گۋتەرريشپەن كەزدەستى، دەپ حابارلايدى Almaty-akshamy.kz سىم-گە سىلتەمە جاساپ.
انتونيۋ گۋتەرريش اۋعانستانعا جاردەمدەسۋ جونىندەگى بۇۇ ميسسياسىنىڭ قاشىقتاعى كەڭسەسىن الماتىدا ورنالاستىرۋ تۋرالى شەشىم قابىلداعانى ءۇشىن قازاقستان پرەزيدەنتىنە العىسىن ءبىلدىردى.
ول ءبىزدىڭ ەلىمىز تۇراقتىلىقتىڭ سيمۆولى جانە كوپجاقتىلىقتى ۇستانۋدىڭ ۇلگىسى بولىپ تابىلاتىنىن ەرەكشە اتاپ ءوتتى.
«قازاقستاننىڭ بۇل شەشىمىن ءبىز تەك كومەك رەتىندە قانا باعالامايمىز. ءسىز بۇۇ مەن قازاقستان اراسىنداعى تاماشا قارىم-قاتىناستاردى ودان ءارى دامىتۋعا ىقپال ەتەتىن ديپلوماتيالىق باۋىرلاستىقتىڭ شىنايى رۋحىن كورسەتتىڭىز»، - دەدى ا.گۋتەرريش.
ءوز كەزەگىندە مينيستر پرەزيدەنت ق.توقايەۆتىڭ بۇۇ-نىڭ بيولوگيالىق قاۋىپسىزدىك جونىندەگى حالىقارالىق اگەنتتىگىن قۇرۋ جونىندەگى باستاماسىنىڭ ىسكە اسىرىلۋ بارىسى تۋرالى ەگجەي-تەگجەيلى حاباردار ەتتى.