بۇۇ-نىڭ اۋعانستانعا كومەك كورسەتۋ جونىندەگى ميسسياسىنىڭ قىزمەتكەرلەرى كابۋلعا قالاي قاتىنايتىنى ايتىلدى.
بىرىككەن ۇلتتار ۇيىمىنىڭ اۋعانستانعا كومەك كورسەتۋ جونىندەگى ميسسياسىنىڭ ارنايى وكىلى جانە باسشىسى دەبورا لايونس ميسسيا قىزمەتكەرلەرى الماتىدان كابۋلعا قالاي قاتىناۋى مۇمكىن ەكەنىن ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«ءبىز الماتىدان اۋعانستانعا تىكەلەي رەيس جاساۋ ءۇشىن كەلىسىمشارت جاساي الامىز. ءبىراق ءقازىر بۇل مۇمكىن ەمەس. دەگەنمەن حالىقارالىق قىزمەتكەرلەرىمىز اۋعانستانعا ۇشىپ، ءبىر-بىرىن اۋىستىرىپ وتىرۋى ءۇشىن الداعى ايلاردا وسىنداي ءدالىز قۇرا الامىز دەپ ۇمىتتەنەمىز. بۇل بىزگە اۋعانستانداعى جۇمىسىمىزدى جالعاستىرۋعا مۇمكىندىك بەرەدى. وسىلايشا قىزمەتكەرلەردى الماستىرىپ وتىرار ەدىك»، - دەدى دەبورا ليونس ورتالىق كوممۋنيكاسيالار قىزمەتىندە وتكەن بريفينگتە.
بۇۇ وكىلى بۇل ماسەلە جۋىق ارادا ءبىرجاقتى شەشىلۋى مۇمكىن دەگەن وي ايتتى.
«كوبىمىز كوروناۆيرۋس ينفەكسياسىنىڭ سالدارىنان قاشىقتان جۇمىس ىستەۋگە ۇيرەنىپ قالدىق. ءبىز كابۋلمەن وتە ءتيىمدى بايلانىس ورناتتىق، وسى كەزدەسۋدەن شىقاننان كەيىن مەن كابۋلمەن كوپتەگەن ماسەلەنى شەشۋ ءۇشىن ءبىرقاتار قوڭىراۋ شالۋىم كەرەك. ادامداردىڭ اۋىسىمىن قامتاماسىز ەتۋ ءۇشىن، ارينە، رەيستەردىڭ بولۋى وتە ماڭىزدى جانە بۇل ءبىز جۇمىس ىستەيتىن نەگىزگى باسىمدىقتاردىڭ ءبىرى بولادى. ءبىز بۇل ماسەلەلەردى دوحامەن دە تالقىلاپ جاتىرمىز»، - دەدى بىرىككەن ۇلتتار ۇيىمىنىڭ اۋعانستانعا كومەك كورسەتۋ جونىندەگى ميسسياسىنىڭ ارنايى وكىلى.