شەبەرحانا جەرگىلىكتى كاسىپكەرلىكتى دامىتۋعا، حالىقتى جۇمىسپەن قامتۋعا مۇمكىندىك بەرەدى.
قاپال اۋىلىندا ءجۇندى وڭدەۋ جانە ۇلتتىق كورپە جاساۋ بويىنشا ەتنيكالىق شەبەرحانا اشىلدى، دەپ حابارلايدى Almaty-akshamy.kz Baq.kz-كە سىلتەمە جاساپ.
بۇگىندە ەل يگىلىگىنە ارنالعان باعدارلامالار مەملەكەتتەن قولداۋ تاۋىپ، كوپتەپ جۇزەگە اسۋدا. تەك باعدارلاما تيىمدىلىگىن پايدالانا بىلۋگە ساۋاتتىلىق، ىزدەنىس قاجەت. اتالعان جوباعا سايكەس ءجۇندى وڭدەيتىن اپاراتتار اكەلىندى.
«تامشىبۇلاق» قوعامدىق قورى «ازاماتتىق باستامالاردى قولداۋ ورتالىعى» كەاق گرانت قاراجاتىمەن جانە «اۋىلدا ازاماتتىق باستامالاردى دامىتۋعا باعىتتالعان ءىس-شارالار كەشەنىن ۇيىمداستىرۋ» تاقىرىبىنداعى بايقاۋ اياسىندا «ءجۇندى وڭدەۋ جانە ۇلتتىق كورپە جاساۋ بويىنشا ەتنيكالىق شەبەرحانا اشۋ» الەۋمەتتىك جوباسىن جۇرگىزۋدە.
جوبانىڭ باستى ماقساتى - ۇلتتىق ءتول ونەردى دامىتۋ ءۇشىن ەتنيكالىق شەبەرحانا اشۋ ارقىلى جۇمىسسىز ايەلدەردى جۇمىسقا ورنالاستىرۋ، سونىمەن قاتار اۋىلدا كاسىپكەرلىكتى دامىتۋ، جاستارعا اتا كاسىپتى ۇيرەتۋ جانە حالىققا قىزمەت كورسەتۋ، سونىڭ ىشىندە الەۋمەتتىك وسال توپتارعا جەڭىلدىكتەر بەرۋ.
«ءقازىر كاسىپتىڭ، ەڭبەكتىڭ زامانى ەمەس پە؟ ءبىز دە ۋاقىت اعىمىنا ىلەسىپ، كاسىپ كوزىن اشۋدى ماقسات ەتتىك. ءتيىستى قۇجاتتارىمىزدى وتكىزدىك. سونىڭ ناتيجەسىندە، باعدارلاما جەڭىمپازدارىنىڭ ءبىرى بولىپ تانىلىپ، قايتارىمسىز گرانتقا يە بولدىق. كاسىبىمىزدى باستاپ، كونە زاماننان قول ۇزبەي كەلە جاتقان، ۇلتتىق قولونەردى دامىتۋىمىز كەرەك»، - دەيدى «تامشىبۇلاق» قورىنىڭ جەتەكشىسى جانات ەسىمبەكوۆ.