بۇۇ الەمدە اشتىقتان جاپا شەككەندەر كۇرت وسكەنىن ايتىپ دابىل قاقتى

بۇل - جەر شارىنداعى حالىقتىڭ 10 پايىزى

ادامزات 2030 جىلعا قاراي اشتىقتان قۇتىلامىز دەگەن ماقساتىنان الشاقتاپ بارادى. بۇۇ ساراپشىلارى وسىنداي قورىتىندى جاسادى، سەبەبى بىلتىر الەمدە 830 ميلليونعا جۋىق ادام ازىقپەن جەتكىلىكتى قامتىلماعان، بۇل - جەر شارىنداعى حالىقتىڭ 10 پايىزى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ەuronews اگەنتتىگىنىڭ مالىمەتىنشە، 2020 جىلمەن سالىستىرعاندا اشتىققا ۇشىراعاندار سانى 46 ميلليونعا ارتتى. جالپى، پاندەميا باستالعاننان بەرى ازىق-تۇلىك جەتىسپەۋشىلىگىنەن زارداپ شەككەندەر سانى 150 ميلليونعا وسكەن. 

«ءبىز كەدەيشىلىكتىڭ شەگىنە جەتىپ قالعانىن كورىپ وتىرمىز، ونىمەن كۇرەسۋ ءۇشىن ونداعان جىلدار بويى جۇرگىزىلگەن كۇش-جىگەر بوسقا كەتتى. الەمدە بايلار مەن كەدەيلەر اراسىنداعى الشاقتىق ۇلعايىپ بارادى. ەرەكشە الاڭداۋشىلىق تۋدىراتىن جايت - ادامداردىڭ قالىپتى تاماقتانۋعا مۇمكىندىگى جوقتىعى»، - دەدى ازىق-تۇلىك جانە اۋىل شارۋاشىلىعى ۇيىمىنىڭ (فاو) باس ەكونوميسى ماكسيمو تورەرو. 

ازىق-تۇلىكتىڭ جەتىسپەۋشىلىگى ازيا، افريكا، لاتىن امەريكاسى جانە كاريب باسسەينىندە بايقالدى. ءقازىر الەمدە جاعداي كۇرت ناشارلادى. ەگەر وزگەرىس بولماسا، 2030 جىلى 670 ميلليون ادام اشتىققا ۇشىرايدى، بۇل - شامامەن 2015 جىلعى كورسەتكىشپەن تەڭ.