«بۇركىتشى قىز – ايشولپان» دەرەكتى ءفيلمىنىڭ تۇساۋكەسەرى ءوتتى
وسىعان دەيىن بۇل تۋىندى الەمنىڭ 30 ەلىندە كورسەتىلگەن. پرەمەراعا ءفيلمنىڭ باس كەيىپكەرى، موڭعوليالىق قازاق قىز، قۇسبەگى ايشولپان دا قاتىستى، دەپ حابارلايدى Almaty-akshamy.kz Almaty.tv-عا سىلتەمە جاساپ.
اتاقتى وتتو بەللدىڭ رەجيسەرلىگىمەن جارىق كورگەن، ساياتشى قىزدىڭ ءومىرى ارقاۋ بولعان دەرەكتى فيلم «وسكار» سىيلىعىنا ۇمىتكەر 15 تۋىندىنىڭ كوشىن باستاپ تۇر.
«2013 جىلدان باستاپ كينو ءتۇسىرىلدى، ياعني ول كينو 2،5 جىل ءتۇسىرىلدى. فيلمدە ءبىرىنشى انا مەن قىزدىڭ تاربيەسى جانە دە قازاقتىڭ ءسالت-داستۇرى، موڭعولياداعى قازاقتاردىڭ تۇرمىس-تىرشىلىگى، كۇندەلىكتى ومىرلىك جاعدايى باياندالادى. 2013 جىلدان باستاپ الەمگە العاش رەت بۇركىتشى قىز رەتىندە تانىلدىم»، - دەدى بۇركىتشى ايشولپان نۇرعايىپ قىزى.
وسى فيلمنەن كەيىن الەمگە تانىلعان ساياتشى قانداسىمىزعا شەتەلدىڭ بەلدى جوعارى وقۋ ورىندارىنا جولدامالار دا ۇسىنىلىپتى. سوعان قاراماستان، بۇركىتشى قىز اتاجۇرتقا ورالىپ، ارمانداعان ماماندىعىنا وقۋعا تۇسكەن.
«العاشىندا، ارينە، ءبارىمىز تاڭقالدىق. سوناۋ وكسفورد، گارۆارد ۋنيۆەرسيتەتتەرى شاقىرتقان بۇركىتشى قىز سۋلەيمان دەميرەل ۋنيۆەرسيتەتىن تاڭداپتى. سونىڭ ىشىندە قازاق ءتىلى مەن ادەبيەتى ماماندىعىنا كەلەدى ەكەن دەگەندە، ول قانداي قىز ەكەن، قازاقشا بىلە مە ەكەن، قانداي ستۋدەنت بولادى ەكەن دەپ ءارى كۇدىك، ءارى ماقتانىشتىڭ بويىمىزدا بولعانى راس»، - دەدى سۋلەيمان دەميرەل اتىنداعى ۋنيۆەرسيتەتتىڭ پروفەسسورى بايان كەرىمبەكوۆا.