بۇل سايلاۋ ءسوزسىز ەركىن ءوتتى – رەسەي فەدەراسياسىنىڭ باقىلاۋشىلارى

رەسەي فەدەراسياسىنان كەلگەن بايقاۋشىلار ميسسياسىنىڭ قۇرامىنداعى ساراپشىلار الماتىداعى سايلاۋ بارىسىنا دايىندىقتىڭ جوعارى دەڭگەيدە ەكەنىن اتاپ ءوتتى.

ميسسيا قۇرامى الماتىداعى 10 سايلاۋ ۋچاسكەسىن ارالاپ شىقتى، دەپ حابارلايدى Almaty-akshamy.kz.

«ءبىزدىڭ ميسسيا تاعايىندالعان كۇننەن باستاپ سايلاۋ بارىسىن ءجىتى باقىلاپ وتىردى. ءبىز سايلاۋ كوميسسيالارى مەن سايلاۋشىلاردىڭ بۇل ناۋقانعا قانشالىقتى دايىن ەكەنىن كوردىك. 10-نان استام ۋچاسكەلەردى ارالادىق. وسىنشا مولشەردەگى تاۋەلسىز، ىشكى قازاقستاندىق بايقاۋشىلاردى كوپتەن بەرى بارلىق سايلاۋ ۋچاسكەلەرىنەن كورمەگەن ەدىك. ەڭ ازى 9 ادام، ءبىر ۋچاسكەدە 25 ادام بولدى. بۇل تەك پارتيالاردان، كانديداتتار اتىنان  بولعان بايقاۋشىلار»، - دەدى رەسەي فەدەراسياسىنىڭ الماتىداعى باس كونسۋلدىعىنىڭ كونسۋل-كەڭەسشىسى ارتەم وگانوۆ.

سايلاۋ بارىسىنا مگيمو (رف) حالىقارالىق زەرتتەۋلەر ينستيتۋتى ەۋروازياتتىق زەرتتەۋلەر ورتالىعىنىڭ جەتەكشى عىلىمي قىزمەتكەرى كنيازيەۆ الەكساندر الەكسەيەۆيچ جوعارى باعا بەردى. ساراپشى داۋىس بەرۋ قورىتىندىسى سايلاۋ بارىسىنان الدەقايدا ماڭىزدى دەگەن پىكىر ءبىلدىردى. 

«مەنىڭ ويىمشا، سايلاۋدىڭ وزىنەن دە ماڭىزدىسى – ونىڭ ناتيجەسى. بۇل پارلامەنتتىڭ جاڭا پالاتاسىن قۇرۋ، ونىڭ قۇرامى بۇرىنعىسىنا قاراعاندا قازاقستان پرەزيدەنتى جۇرگىزىپ جاتقان رەفورمالارعا  كوبىرەك سايكەس كەلەدى»، - دەدى ول.

ساراپشىلاردىڭ ويى ءبىر جەردەن شىعىپ، ولار سايلاۋ ۇدەرىسىنىڭ اشىقتىعىن جانە سايلاۋ كوميسسيالارىنىڭ بىلىكتىلىگىنىڭ جوعارى دەڭگەيىن اتاپ ءوتتى. سپيكەرلەر سونىمەن قاتار كەدەرگىسىز ورتاسى بار سايلاۋ ۋچاسكەلەرىنىڭ بارىنا دا  نازار اۋداردى.