ق ر پارلامەنتى سەناتىنىڭ ءتوراعاسى ماۋلەن اشىمبايەۆ قازاقستاندىقتاردى رەسپۋبليكا كۇنىمەن قۇتتىقتادى، دەپ حابارلايدى Almaty-akshamy.kz Inform.kz-كە سىلتەمە جاساپ.
«قۇرمەتتى دوستار! بارشاڭىزدى ۇلتتىق مەرەكەمىز – رەسپۋبليكا كۇنىمەن شىن جۇرەكتەن قۇتتىقتايمىن!
مەملەكەتتىك ەگەمەندىك تۋرالى دەكلاراسيا – دەربەستىگىمىزدى ايعاقتاعان جانە تاۋەلسىزدىگىمىزدىڭ قۇقىقتىق نەگىزىن قالاعان اسا ماڭىزدى قۇجات. ەلدىك پەن ەركىندىك جولىندا تاريحي شەشىم قابىلدانعان كۇندى ۇلتتىق مەرەكەگە اينالدىرۋ – وتانشىلدىق رۋحىمىزدى اسقاقتاتار ۇتىمدى قادام. الداعى ۋاقىتتا بۇل كۇننىڭ قادىر-قاسيەتى ودان ءارى ارتىپ، ازاتتىعىمىزدى ايشىقتايتىن ناعىز جالپىحالىقتىق مەرەكە بولارىنا ەشقانداي كۇمانىمىز جوق.
بۇگىن ايتۋلى كۇنگە وراي ەلىمىزدىڭ بارلىق وڭىرىندە كوك تۋىمىزدى كوتەرۋگە ارنالعان سالتاناتتى ءراسىم ءوتتى. پرەزيدەنتىمىز قاسىم-جومارت كەمەل ۇلى توقايەۆ ايتقانداي، بۇل – ۇرپاق ساناسىندا وتانسۇيگىشتىك قاسيەتتى، ەلدىك رۋح پەن ۇلتتىق ۇستانىمدى بەكەمدەي تۇسەتىن ماڭىزدى شارا. ءاردايىم وسىلاي كوك بايراعىمىز كوگىمىزدە جەلبىرەپ، ەگەمەندىگىمىز نىعايا بەرسىن!
بارشاڭىزدى قۇتتىقتاي وتىرىپ، ءار شاڭىراققا باق-بەرەكە، ەلىمىزگە اماندىق، جەرىمىزگە تىنىشتىق تىلەيمىن! ەڭسەلى ەلدىكتىڭ ءمانى مەن ماڭىزىن ارتتىرا تۇسەتىن ۇلتتىق مەرەكەمىز قۇتتى بولسىن!»،-دەدى ماۋلەن اشىمبايەۆ.