قىرعىزستاندا بۇرىنعى پرەزيدەنت المازبەك اتامبايەۆتىڭ وتباسىن بىشكەك ماڭىنداعى قوي-تاش اۋىلىنداعى ۇيىنەن سوت ورىنداۋشىلارى كۇشتەپ شىعاردى، دەپ حابارلايدى اqshamnews.kz ءتىلشىسى.
ەكس-پرەزيدەنتتىڭ ۇلى قادىربەك اتامبايەۆ بۇل تۋرالى الەۋمەتتىك جەلىدەگى پاراقشاسىندا جازىپ، بيلىكتىڭ ارەكەتىن "زاڭسىزدىق" دەپ باعالادى.
"انامدى جانە وتباسىمنىڭ وزگە مۇشەلەرىن قوي-تاشتاعى ۇيدەن زاڭسىز شىعارىپ جاتىر. بۇل - اتا-بابامىزدىڭ جەرى. بار بولعانى 100 مەتر جەردە بارلىق تۋىستارىمىز جەرلەنگەن. بۇل - ناعىز باسسىزدىق"، - دەدى ول.
ونىڭ ايتۋىنشا، ءىس قالالىق سوتتا قارالىپ جاتقانىمەن، سوت ورىنداۋشىلارى "جوعارىدان كەلگەن نۇسقاۋ" بويىنشا ەش ەسكەرتۋسىز كەلىپ، وتباسى مۇشەلەرىن كوشەگە شىعارىپ، زاتتارىن كونتەينەرگە تيەپ اكەتكەن.
اتامبايەۆتىڭ قىزى ءاليا شاعييەۆا دا رەسمي قۇجات نەمەسە سوت شەشىمى كورسەتىلمەگەنىن ايتىپ، وتباسىنىڭ جاۋىن استىندا قالعانىن جەتكىزدى. ءقازىر ولار تۋىستارىنىڭ ۇيىندە ۋاقىتشا تۇرىپ جاتىر.
مەملەكەتتىك اكتيۆتەردى باسقارۋ اگەنتتىگى ءۇيدىڭ سوت شەشىمىمەن مەملەكەت مەنشىگىنە قايتارىلعانىن مالىمدەدى. بۇل جەرگە قارتتار ءۇيى مەن 500 بالاعا ارنالعان بالاباقشا سالۋ جوسپارلانىپ وتىر. قۇرىلىس جۇمىستارى تاياۋدا باستالىپ، كەلەسى جىلى اياقتالۋى ءتيىس.
ەسكە سالايىق، 2019 جىلى قوي-تاشتا اتامبايەۆتى ۇستاۋ وپەراسياسى كەزىندە قاقتىعىس بولىپ، ءبىر ارنايى جاساق قىزمەتكەرى قازا تاۋىپ، جۇزدەن استام ادام جارالانعان ەدى. 2022 جىلى باستالعان سوت پروسەسىنە كەيىن جەمقورلىق ىستەرى قوسىلدى.
2023 جىلى اتامبايەۆ يسپانياعا ەمدەلۋگە كەتىپ، سودان بەرى وتانىنا ورالعان جوق. بيىل ماۋسىمدا سوت ونى 11 جىل 6 ايعا باس بوستاندىعىنان ايىرىلىپ، مۇلكىن تاركىلەۋ جانە مەملەكەتتىك ماراپاتتارىنان ايىرۋ تۋرالى ۇكىم شىعاردى. پرەزيدەنت سادىر جاپاروۆ ۇكىمدى قاتاڭ دەپ اتاپ، ەگەر اتامبايەۆتىڭ جاقىندارى ءوتىنىش بىلدىرسە، ونى كەشىرۋگە دايىن ەكەنىن جەتكىزگەن.