ءماجىلىس ءتوراعاسى ەرلان قوشانوۆ بۇگىن ەلورداداعى №163 رەفەرەندۋم ۋچاسكەسىندە داۋىس بەردى.
پالاتا سپيكەرى «قازاقستان تەمىر جولى» عيماراتىنداعى سايلاۋ ۋچاسكەسىنە كەلىپ، ەلوردا تۇرعىندارىمەن بىرگە اتوم ەلەكتر ستانسياسىن سالۋ ماسەلەسى بويىنشا رەسپۋبليكالىق رەفەرەندۋمدا ءوز تاڭداۋىن جاسادى.
«بۇگىنگى رەفەرەندۋم ەلىمىز ءۇشىن ماڭىزدى كۇن، سوندىقتان ەرەكشە كوڭىل-كۇيدەمىن. بۇل – مەملەكەتىمىزدىڭ بولاشاعىنا قاتىستى ماڭىزدى شەشىم قابىلداناتىن كۇن. ەڭ باستىسى، وسى شەشىمدى حالىق ءوزى قابىلداپ جاتىر. بۇعان دەيىن قابىلدانعان كونستيتۋسيالىق رەفورما ارقىلى ءار ازاماتتىڭ مەملەكەت ساياساتىنا بەلسەنە ارالاسۋىنا مۇمكىندىك جاسالدى. بۇگىن وسىنىڭ ناقتى كورىنىسىن كورىپ وتىرمىز. بارلىق وڭىرلەردە ازاماتتارىمىز ءوز داۋىستارىن بەرۋدە. ءار ايماقتان كەلىپ جاتقان اقپاراتتارعا قاراعاندا، حالىقتىڭ بەلسەندىلىگى وتە جوعارى. مەملەكەتىمىزدىڭ بولاشاعى ءۇشىن حالىق دۇرىس شەشىم قابىلدايتىنىنا سەنىمدىمىن»، - دەدى ءماجىلىس ءتوراعاسى.