الماتى اكىمى ەربولات دوسايەۆ الماتىلىقتاردى قالا كۇنىمەن قۇتتىقتادى
قۇرمەتتى الماتىلىقتار، قالا مەيماندارى!
مەن بۇگىن سىزدەردى قالا كۇنىمەن قۇتتىقتاۋعا شىن جۇرەكتەن ريزامىن! بۇل بارلىعىمىز ءۇشىن، ءار الماتىلىق ءۇشىن ەرەكشە مەرەكە!
الماتى – اسا باي تاريحى، ەرەكشە مادەنيەتى جانە تاڭ قالدىراتىن كوركەم تابيعاتى بار عاجاپ ءارى بىرەگەي قالا.
ءبىزدىڭ شاھار ەلىمىزدىڭ رۋحاني جانە مادەني ورتالىعى، قازاقستان تاۋەلسىزدىگىنىڭ التىن بەسىگى بولىپ تابىلاتىن ەرەكشە مەكەن. الماتى تاريحىنا كوز سالساق، ول ءار ۋاقىتتا عالىمدارعا، اقىندارعا، مۋزىكانتتار مەن ساۋلەتشىلەرگە شابىت بەرگەن. وسى ۇلى تۇلعالار قالامىزدا تۇرىپ، ءوز شىعارمالارىن ومىرگە اكەلىپ، شاھار كەلبەتىن ارلەندىرىپ، جانىن سالىپ، الماتىنىڭ ەرەكشە مادەني كودىن جاساقتاپ كەلدى.
ايگىلى كلاسسيك رەمارك «ەڭ عاجاپ قالا – ول ادامنىڭ باقىتتى بولعان جەرى» دەپتى. مەن وسىندا ءتۋىپ-وستىم، ەڭ جىلى ەستەلىكتەرىم وسى قالامەن بايلانىستى. مۇندا شاڭىراق قۇردىم، بالالارىم ءوسىپ كەلەدى.
ءسىز بەن ءبىزدىڭ سۇيىكتى قالامىز – شىنىمەن جاندى قالا، ەرەكشە ەنەرگەتيكاعا باي شاھار. قالامىز جايلى مىڭداعان ارناۋ جازىلدى، اسەرلى اندەر شىرقالدى، جاسىل جەلەكتى ادەمى كورىنىسىن بەينەلەگەن سانسىز سۋرەتتەر سالىندى.
الماتى تاريحىندا وزگە ءىرى قالالاردىڭ تاريحىنداي گۇلدەنۋ مەن قۇلدىراۋ (تومەندەۋ) كەزەڭدەرى جانە زور قۋانىش پەن ۇلكەن قايعى ساتتەرى بولدى. قاڭتاردىڭ قايعىلى وقيعالارى ءبىزدىڭ سانامىزدى مۇلدە وزگەرتتى. ءبىز قورشاعان الەمنىڭ قانشالىقتى نازىك ەكەنىن تۇسىندىك جانە بەرەكە دەگەن بايلىقتى باعالاپ، ونى كۇيزەلىس پەن زۇلىمدىقتان ساقتاۋدىڭ ماڭىزىنا كوز جەتكىزدىك. الماتى فەنيكس قۇسى سياقتى قايتا تۇلەپ، بۇگىن ونىڭ بەلسەندى دامۋىن جانە قارقىندى العا جىلجۋىن كورىپ وتىرمىز.
الماتى رۋحىن قالپىنا كەلتىرۋ – ول ءبىرىنشى كەزەكتە قالانىڭ ءار تۇرعىنىنىڭ جەكە ۇلەسى مەن ءرولى بولىپ تابىلادى. ءبىزدىڭ سۇيىكتى قالامىزدىڭ ەكى ميليوننان استام ازاماتتارىنىڭ زور جاسامپاز ەنەرگياسى، كرەاتيۆتىلىگى، ەڭبەكقورلىعى مەن ءوز قالاسىنا دەگەن سۇيىسپەنشىلىگى – بۇل ءبىزدىڭ تۇراقتى جانە نىق دامۋدىڭ بەرىك نەگىزى.
بىزدە الماتىنى دامىتۋ بويىنشا ۇلكەن ماقسات پەن مىندەتتەر بار. بارلىعىمىز بىرگە قالامىزدى ودان ءارى كوركەيتۋگە اتسالىسۋىمىز كەرەك. باستى ماقسات – جايلى قالالىق ورتا قۇرۋ جانە مەگاپوليستىڭ بارلىق اۋدان تۇرعىندارىنىڭ تابىسىن ارتتىرۋ. ءبىز وسى اپتادا قابىلدانعان «الماتى قالاسىنىڭ 2025 جىلعا دەيىنگى دامۋ باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالارىن» ءتيىمدى جۇزەگە اسىرۋعا مىندەتتىمىز. بۇعان بارلىق كۇش-جىگەرىمىزدى، تاجىريبەمىز بەن ءبىلىمىمىزدى جۇمسايمىز.
الماتىنىڭ بارلىق تۇرعىنىنا شىن جۇرەكتەن ءمولدىر ماحاببات پەن زور دەنساۋلىق تىلەيمىن! ءبىزدىڭ الماتى كوركەيىپ، گۇلدەنە بەرسىن!