مادەنيەت جانە سپورت ءمينيسترى اسحات ورالوۆ مۇراعات سالاسىنداعى وزەكتى ماسەلەگە توقتالدى.
ونىڭ ايتۋىنشا، ەلىمىزدە 20-عا جۋىق مەملەكەتتىك مۇراعات عيماراتىن سالۋ قاجەت. بۇل تۋرالى مادەنيەت جانە سپورت مينيسترلىگىنىڭ كەڭەيتىلگەن القا وتىرىسىندا ۆەدومستۆو باسشىسى اسحات ورالوۆ ايتتى، دەپ حابارلايدى Almaty-akshamy.kz.
«مۇراعات سالاسىنداعى وزەكتى ماسەلە – بۇكىل ەل بويىنشا مۇراعات قويمالارىنىڭ تولعانى. ماسەلەن، بۇگىنگى تاڭدا 500 مىڭ بىرلىكتى ساقتاۋعا ارنالعان 20-عا جۋىق مەملەكەتتىك مۇراعات عيماراتىن سالۋ قاجەتتىلىگى بار. ارينە، بۇل باستاما ۆەدومستۆوارالىق جۇمىس پەن ۇيلەستىرۋدى تالاپ ەتەتىنى ءسوزسىز. بيىلعى جىلى نەگىزگى مىندەت – يندۋستريا جانە ينفراقۇرىلىمدىق دامۋ مينيسترلىگىمەن ءوزارا ءىس-قيمىل جاساي وتىرىپ، جوبالاۋ-سمەتالىق قۇجاتتامانى ازىرلەۋ»، - دەدى اسحات ورالوۆ.
ەسكە سالا كەتەيىك، وتكەن جىلى تاريحي قۇجاتتاردى تۇگەندەۋ ماقساتىندا ماماندار شەت ەلدەردەن قازاقستانعا 7 مىڭنان استام قۇجات اكەلىنگەن.