الماتىدا وتكەن جىلى جۇزگە جۋىق ادامنىڭ ءولىمى جول اپاتى سالدارىنان بولدى

قالادا وتكەن جىلى 4 مىڭعا جۋىق جول اپاتى بولعان.

الماتى تۇرعىندارى مەن قوناقتارىنىڭ جايلى ءارى ءقاۋىپسىز ءومىر ءسۇرۋىنىڭ ماڭىزدى فاكتورى – جول قاۋىپسىزدىگى. وتكەن جىلى قالا جولدارىندا زارداپ شەككەندەرمەن 3826 جول-كولىك وقيعاسى تىركەلىپ، سونىڭ سالدارىنان 96 ادام قازا تاۋىپ، تاعى 4364 ادام جاراقات العان، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«جكو، جول-كولىك جاراقاتتارى مەن ءولىم-جىتىم سانىن ازايتۋ ماقساتىندا ءبىز جول-كولىك وقيعالارىنا تالداۋ جۇرگىزىپ جاتىرمىز، ونىڭ نەگىزىندە ءقاۋىپتى اۋماقتاردا پاترۋلدەۋ كۇشەيتىلىپ، جول جاعدايىن جاقسارتۋعا نۇسقامالار جاسالۋدا، ونىڭ ىشىندە باعدارشامدار مەن جاياۋ جۇرگىنشىلەر وتكەلدەرىن، جارىقتاندىرۋدى ورناتۋ. جول قوزعالىسى ەرەجەسىن بۇزۋشىلاردى جاۋاپكەرشىلىككە تارتۋ دا ءتيىمدى الدىن الۋ شارالارىنىڭ ءبىرى سانالادى. وتكەن جىلى 1 348 981 جول ەرەجەسىن بۇزۋ دەرەگى انىقتالدى. ماس كۇيىندە كولىك جۇرگىزگەن 2225 ادام ۇستالدى»، – دەدى الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ.

سونداي-اق سوت شەشىمىمەن 3 254 جۇرگىزۋشى كولىك قۇرالدارىن باسقارۋ قۇقىعىنان ايىرىلدى. 2212 كولىك جۇرگىزۋشىسى اكىمشىلىك قاماۋعا الىندى. قالا جولدارىندا 590 باعدارشام، 45379 جول بەلگىسى ورناتىلعان. قالا بويىنشا 1918 جاياۋ جۇرگىنشىلەر وتكەلى ۇيىمداستىرىلدى.